Danmarkimi ilinniartut tamarmik WildCardimik pisisinnaalerput

Kalaallit Danmarkimi ilinniagaqartut 26-t sinnerlugit ukioqarunik DSB-p akiliutitut atortittagaanik, WildCardimik, pisisinnaalerput, taamaalillutik qimuttuitsunut akikinnerusumik ilaasinnaalissallutik.
Allattoq Louise M. Kleemann
septembarip 04-at 2008 09:28

26-t inorlugit ukiullit kisimik manna tikillugu akikinnerusumik qimuttuitsorsinnaasimagaluarput.

26-t sinnerlugit ukioqalersimappata, WildCardimillu pisissappata, DSB-p manna tikillugu piumasarisimavaa ilinniagaqarnersiutisianik, SU-mik, pisartagaqassasut.

Aaqqiinerulli tamassuma kingunerisimavaa, kalaallit Danmarkimi ilinniagaqartut 26-t sinnerlugit ukiullit WildCarditaarsinnaannginnerat, taakkumi iliniagaqarnersiuteqaratik ilinniarnermut ikiorsiissutinik, USF-imik aamma taaneqartartunik, Namminersornerullutik Oqartussanit pisarput.

DSB Kalaallit Danmarkimi Ilinniagaqartut Kattuffiata, Avalaap, WildCardit pillugit isumaqatigiissuteqarfigisimavaa.Kalaallit ilinniagaqartut ukioqqortunerulaartut akikinnerusumik qimuttuitsorsinnaanngormata kattuffimmiit nuannaarutigineqarpoq.

Ilinniagaqartut WildCardimik pissarserusukkunik paasissutissat imminnut tunngasut allariarlugit Avalammut saaffiginnissapput, WildCarditaarnissaallu Avalammit isumagineqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq