“Qinersisussat allattorsimaffimmi nalunaarsoqqanerlutit qulakkiissallugu nammineq akisussaaffigaat. Nalunaarsoqqanerit uppernarsartinniarukku kommunerisat attavigiuk.”

Taama Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfimmiit, Danmarkimi Kalaallit Illuutaasa danmarkimilu kalaallit ilinniartut peqatigiiffiata Avalaap fabruaarip sisamaanni nalunaarutisiaanni allaqqavoq.

Mailisiaat danmarkimi kalaallit ilinniartut Inatsisartunut allakkatigut qinersinissamut 11. marsimi pisumut periarfissaqarneri pillugit paasissutissiissutaasussaavoq.

Ilinniartut allakkatigut qinersisinnaassagunik Kalaallit Nunaanni kommunerisaminniit qinersisussat allattorsimaffianni nalunaarsoqqassapput.

Paasissutissiinerli kissaatigisamiit naammagisimaarnarsimanngeqaaq, Aarhusimi Avalammi siulittaasoq Anouk Holm Jensen oqarpoq.

- Avammut saqqummiunneqartut pillugit amigaatilerujussuusut misigaarput. Pingaartumik qinnuteqaatip nassiunnissaanut ulloq killigitaasoq eqqarsaatigalugu, KNR-imut taanna oqarpoq.

Qinersisussat allattorsimaffiannut nalunaarnissamut ullormik killigititaasumik allakkami allaqqasoqanngilaq.

Tamanna naalakkersuisoqarfiup nammineq malugilerlugu Kalaallit Illuutaannut Avalammullu mailikkut februaarip 27-ani utoqqatsissutigaa.

Qinersinissamut qinnuteqarnissaq februaarip 17-ianut killeqarsimavoq – tassa ullut qulit sioqqullugit.

- Tamanna qinersisussat allattorsimaffiannut qinnuteqarnissamut taamaalillunilu qinersinermi taasisinnaanissamut amerlasoorpassuit angumersinngitsoornerinik kinguneqarpoq, Anouk Holm Jensen oqarpoq.

Kommuninut attaveqarniarneq ajornartoq

Qinersisussat allattorsimaffiinut nalunaarsortinniaraanni allakkani  naalakkersuisoqarfimmeersunit kommunit ataasiakkaat innersuunneqarput.

Taamaattorli kommunini tallimani qinersinermut attuumassutilinni immikkoortoqarfinni aalajangersimasuni attaviusinnaasunik allaqqasoqanngilaq.

Kommunini piffissaqarluarluni sullinneqassagaanni qinersisussat allattorsimaffiinut nalunaarsortinnissamut qinnuteqarneq siusinaarluni qinnuteqartoqassasoq, Kalaallit Illuutaata Avalaallu najoqqutassiaanni allaqqasoq Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfimmi immikkoortortami pisortaq Aká Grønvold KNR-imut mailikkut allappoq.

Anouk Holm Jensenip Kommuneqarfik Sermersuumi kommunerisami nittartagaani maili nammineerluni nassaaraa, ilinniaqatigisaminullu kommuneqatigisaminut nassiuteqqillugu.

Danmarkimi Aarhusimi Region Midtjyllandimiittuusumi kalaallit ilinniartut amerlanerpaartaat Kommuneqarfik Sermersuumeersuupput.

Ilinniartunulli ataasiakkaanuttaaq kommuniniit allaneersut oqarasuaatikkut attaviginninniarnerigaluat ajornakusoorsimavoq. Tamatuma saniatigut ilinniartut arlallit qinersisussat allattorsimaffiannut nalunaarsortikkusullutik qinnuteqarsimapput, qinnuteqaatilli akuerineqarneranik kingusinaarlutik akissutisipput akineqanngivissorsimallutilluunniit, Avalammi siulittaasoq oqarpoq.

Kommuneqarfik Sermersuumi sulisumik apersuiniaraluarneq iluatsissinnaasimanngilaq. Kommunimi attaveqaqatigiinnermut immikkoortortaqarfiup KNR-imut malimini isornartorsiuineq tupigusuutiginerarpaa.

- Qinersisoqarnissaa nittartakkakkut februaarip arferngani saqqummiunneqarmat, qinersisinnaatitaaneq pillugu paasissutissat tamarmik saqqummiunneqarput. Tassani immersugassanik, mailerfissamik qinnuteqarfissallu ullua kingulleq immikkoortumi erseqqissumik allaqqavoq, taakkualu assersuutigalugu Danmarkimi ilinniartunut nassuiarneqarnikuullutik.

Kommuneqarfik Sermersuumi qinersisussat allattorsimaffiannut nalunaarsortikkusulluni qinnuteqaat, kommunip mailiinut pingaarnernut allanut nassiunneqarsimappat mailimut eqqortumut ingerlateqqinneqartartut,  Attaveqaqatigiinnermut immikkoortortaqarfiup aamma ilisimatitsissutigaa.

Avalak: Qinerserngaartunut paasissutissanik immikkut pisariaqaraluartut

Ilinniartut namminneerlutik inatsisinik misissuinissaminnut aamma akisussaaffeqartut, Anouk Holk Jensenip nassuerutigaa.

Qinersisussat allattorsimaffiannut nalunaarsortinniarluni qanoq qaqugulu qinnuteqartoqarsinnaanersoq, Namminersorlutik Oqartussat mailerutigisaanni Kommuneqarfik Sermersuullu nittartagaani erseqqinnerusumik allaqqasariaqaraluartut taanna isumaqarpoq.

- Amerlappummi qinersinngisaannarsimasut ilaqarpulli qinersinikuugaluarlutik allakkatigut qinersinikuunngisaannarsimasunik. Tamatumunngalu erseqissumik saqqummiunneqarnissaa pingaaruteqartuusoq isumaqarpunga. Qanormi ilillutik nalussannginnamikku?

Ilinniartut peqatigiiffianniit isornartorsiuineq Aarhusimi Kalaallit Illuutaanni pisortaq Tanja Nielsen KNR-imut tapersiivoq. Kalaallit Nunaanni inuiaqatigiinnut ilusilersueqataasussaammata kalaallit Danmarkimi ilinniartut qinersisartuni pingaaruteqartuusut tapersersorneqarnerusariaqaraluartut, taassuma uparuarpaa.

- Naalagaaffiup tamanna pimoorutissagaa inassutigaarput. Nunarsuarmi sumiikkaluaraanniluunniit kalaallit qinersisinnaasut tamarmik tusaaneqarnissartik pisinnaatitaafigaat, Tanja Nielsen oqarpoq.