Danmarkimi ilinniagaqartut ilinniakkatik Nunatsinni atorniarpaat
Tusagassiuutini allaaserineqartut, kiisalu Danmarkip Radioata piviusulersaarut aallakaatitaa, "Kalaallit Nunaanniit qimarranneq", pissutigalugit, kalaallit Danmarkimi ilinniagaqartut ilinniarnertik naammassigunikku angerlaqqinniarnatik aalajangersimanissaat pasitsannarsinnaagaluarpoq.
Taamaattorli kalaallit Danmarkimi ilinniagaqartut kattuffiata Avalaap apersuilluni misissuisimanerani allatut isumaqartoqartoq paasinarsivoq.
Aperineqartut 5%-ii ataallugit ilinniagartik naammassigunikku nunatsinnut uteqqinnissartik kissaatiginngilaat. Amerlanerpaartaasa ilinniagaqareerlutik nunatsinnut uteqqinnissaminnik ilinniakkamillu nunatsinni atornissaanik kissaateqarnertik erseqqissumik takutippaat. Pingajorarterutigajaasa Danmarkimiiginnassanerlutik uterumaarnerlutilluunniit suli aalajangersimanngilaat.
Avalaap ilaasortaani 500-suni 100-t missaanniittut apeqqutinik akisisimapput, kattuffiup nutaarsiassanik allagaanni atuarneqarsinnaavoq.