Danmarkimi ilinniagaqartoq neriuppoq kalaallimik inuusuttumik folketingimut isertoqassasoq
Århusimi inuiaqatigiilerinermi politikkimilu universitetimi ilinniagaqartoq Marthannguaq Rasmussen neriuppoq Kalaallit Nunaanniit folketingimut ilaasortanngortussat kalaallinut ilinniagaqartunut attaveqarluartassasut.
Aperaarpullu nammineq Kalaallit Nunaanni qineqqusaartunut malinnaasimanersoq.
- Aap oqaatigisinnaavara folketingimut qineqqusaartunut tusagassiutit aqqutigalugit malinnaaffigigakkit. Kisiat soorunalimi malinnaaffigineruakka maanni Danmarkimi qineqqusaartut, Marthannguaq Rasmussen oqarpoq.
Kalaallit Nunaanniit folketingimut isertussat, isummat malillugu suut sullittariaqarpaat?
- Ilinniartut atugarisaat annertuumik pitsanngorsaavigineqartuupat pitsaassagaluaqaaq. Danmarkimi ilinniartut pisinnaatitaaffi annertuumik annikillisarneqarnikuupput. Atuakkatigut tapiiffigitittarneq uninnikuuvoq, tamanna erloqinartorujussuuvoq.
Neriuutigaara folketingimut isertussaq inuusuttuusasoq ilinniartut atugarisaanik ilisimasaqartoq ilinniartunullu paasinnissinnaasoq, taamma oqarpoq Marthannguaq Rasmussen Århusimi inuiaqatigiilerinermi politikkimilu universitiitimi ilinnigaqartoq.
