Danmarkimi højskoli kalaallinik inuusuttunik nukittorsaaqataalersoq

Jyllandip avannaani Vråmi højskoli, højskolinik efterskolinillu allanik kalaallinik ilinniartussaminnik tikilluaqqusilluarnissaannut ilinniartitsisussatut Namminersorlutik Oqartussanit toqqarneqarsimavoq.

- Vrå Højskolimi atuartut iluatsitsilluartarnerat Namminersorlutik Oqartussanit maluginiarneqarsimavoq, misilittakkavullu maanna ingerlateqqittussanngorpagut, forstanderi Pia Schnoorr aviisimut Nordjyske Stiftstidendemut taama oqarpoq.

Taanna Namminersorlutik Oqartussanik suleqateqarnermik aallartisaajartorluni Nunatsinneeqqammerpoq. Amerlanerusut Danmarkimi højskolernissamut piukkunnarsarneqarnissaat, tamatumalu malitsigisaanik Nunatsinni ilinniartitaanerup iluani ilinniakkaminnik taamaatitsiinnartartut ikilisinnissaat anguniagaavoq.

- Højskolimiinnermikkut imminnut tatiginerulersinniarneqarlutillu attaveqarnissaminnut pikkorinnerulersinniarneqassapput. Ilinniagaqassagunimmi tamakku pisariaqartippaat, aviisimut taama oqaluttuarpoq.

Højskoli ilinniartitsissutinik højskolit efterskolellu allat atorsinnaasaannik suliaqassaaq.

Inuusuttullu ilaatigut angerlarsertarnerup qanoq iliuuseqarfiginissaanik ilinniartinneqassapput.

- Inuusuttorpassuarnut ajornartorsiutaasarpoq. Højskolimiinnermi angerlarsimaffigisap qimaqqalaarnissaa misilinneqarsinnaavoq peqatigisaanillu inooqataanikkut isumagineqarluni, forstanderi Pia Schnoor Nordjyske Stiftstidendemut taama oqarpoq.