Danmarkimi anorersuarnera Air Greenlandimik akornusersuivoq
Issimasut 198-t Billundimut nunnikkamik timmisartumiiginnartariaqarsimapput, aatsaallu unnukkut qulit-qeqqanut Københavnimut ingerlaqqissinaasimapput, qulit qaangeraa tanneq pingasut missaanni anngullutik.
Silasiorfiup DMI-p uuttortaanera malillugu Danmarkimi aatsaat taama sakkortutigisumik ippassaq anorersuarpoq.
Anorersuarujussuarmat Sønderjyllandimi Alsimi sekundimut meterinik 53,5-nik sakkortussuseqarsimavoq, Kegnæsimilu sakkortunerpaalluni nalunaaqquttap-akunneranut 193 kilometerinik sakkortussusilimmik anoraasuasarsimalluni.
1999-imi decembarimi anorersuarujussuallarmat rekordiugaluarpoq. Taamani anorersuaq sekundimut meterinik 51,4 -nik sakkortussuseqarsimavoq, tassa nalunaaqquttap-akunneranut 185 kilometerinik, DMI-mit ilisimatitsipput.
Anorersuarli allatigut aamma rekordiliivoq. DMI-mit nalunaarutigineqarpoq, 1874-imi uuttortaasaleramilli ippassaq aatsaat taama sakkortutigisumik anorersuartoq.
Sjællandimi Røsnæsimi anorersuaq akunnattumik sakkortussusilik uuttorneqarmat sekundimut meterinik 39.5-imik sakkortussuseqarsimavoq, imaluunniit nalunaaqquttap-akunneranut 142 kilometerinik.
Siornatigut rekordiliisoqarmat 38,1 sekundmeteriuvoq, nalunaaqquttap-akunneranut 137 kilometeri. Taanna rekordi decembarimi 1999-imeerpoq.
Anorip agguaqatigiissillugu sakkortunerpaaffia Sjællandimi Røsnæsimi uuttortarneqarsimavoq, sekundimut meterit 39,5-it angusarsimallugit, tassalu nalunaaqquttap akunneranut kilometerinik 142-nik sakkortussuseqarsimalluni.
Tamannali Nunatsinni anorip sakkortussusaanik rekordiliinernut sanilliutissagaanni suunngilaq!
Tasiilami 1970-imi februaarip ulluisa arfineq aappaani piterallarmat anoraa sekundimut meterinut 90-inut uuttortarneqarsimavoq, nalunaaquttap akunneranut kilometerinik 324-inik sakkortussuseqarluni.
Danmarkshavnimilu 1995-imi januaarip 13-iani anoraasuasarnera sekundimut meterinut 75,1-inut uuttortarneqarpoq, nalunaaqquttap akunneranut kilometerinik 270-inik sakkortussuseqarluni.
Danmarkimi tamanna anguneqarsinnaagunanngivippoq!
