Danmarkimi ambassadørit ataatsimiipput
DR-ip politikkikkut suleqataata Jens Ringbergip ataatsimiinnerup suna siunertarineraa oqaluttuaraa:
- Nunanut allanut ministereqarfiup Muuamaamik titartakkat siulliit takkummatali nunani assigiinngitsuni ambassadørit ataatsimeeqatigiuartarsimavai, ullumikkullu ilaatigut Egyptenimit, Iranimit, Indonesiamit Marokkomillu aallartitat ataatsimeeqatigineqarlutik. Ataatsimiinneq taanna imatorsuaq pingaartorsiutaanngilaq, ima paasillugu, Nunanut allanut ministereqarfiup qullersarpiai ministeri ilaagaluartoq ilaanngillat, tassalu taakkua tullersortaat ilaallutik. Tamatumunnga pissutaasoq tassa oqaatigineqartutut isummanik paarlaasseqatigiinnissaq, ullumikkullu soorunami titartakkat naqeqqinneqarnerat sammineqarpoq. Danskit aallartitaat nassuiaavoq Danmarkimi aviisit suna pillugu piumasannguaminnik iliorsinnaanersut, suliassamilu piffissami kingullermi sammineqartut, tassalu apeqqutit Villy Søvndalimut tunngasut ullumi ataatsimiinnermi oqaluuserineqarlutik.
-Ambassadørit ataatsimmiinneq sioqqullugu ataatsimeereernerullu kingorna qanoq oqarpat?
-Oqaaseqangaanngillat. Taakkunannga arlallit oqaaseqatsiartaraluarput. Nutaarsiassanik saqqummersoqarnissaa oqaloqatigiinnerullu annertunerusumik siuariartoqarnissaa ilimaginngilaat. Tamarmik assigiingajattumik akissuteqartarput, kingornatigut Iranimiut ambassadøriat oqaloqatiginiarlugu misilippara iluatsillugulumi, aperalugulu, nutaarsiassanik saqqummersoqarsimanersoq, taamaannginnerarpaalu, biilimillu aallarlutik. Aallartitanit Palæstinamiut aallartitaat oqarpoq, soorunami titartakkanit taakkunannga narrujuummisinneqaraanni akerliuniartoqartariaqarnera aalajangiusimallugu, Danmarkili nunatut eqqorneqassanersoq oqaaseqarfigiumanagu nioqqutissiaasalu taama annertutigisumik mattunneqarnissaat illersorsinnaanagu.
