Danmarkimi akuunerulersitsiniarnermut ikiorsiissutissat suli tunniunneqanngitsut

Suliniutit arlallit aallarteriaannanngorlugit piareersimatinneqarput, aningaasaliissutilli amigaataanerat pissutigalugu kinguarsarneqarlutik.

- Suli tigusaqanngilagut.
Aarhusimi kalaallit illuutaani pisortaq Jørn Holbech aningaasaliissutit qilanaarisimasaraluatik pillugit taama oqarpoq.

Aningaasaliissuteqartoqarnissaa sivisuumik sulissutigineqarpoq

Kalaallit Danmarkimiittut inuiaqatigiinni akuunerulersinneqarnissaanut atugassanik ukiormanna 4 millionit koruuninik aappaagulu suli allanik 4 millionit koruuninik aningaasaliisoqarnissaa, folketingip aningaasaqarnermut ataatsimiititaliaata maajip 13-ianni akuersissutigigaluarpaa.

Aningaasaliissutit taakku siusinnerusukkut isumaginninnermut ministeriusup Manu Sareenip decembarimi 2014-imili akuersissutigigaluarpai.

Maannamulli annerusumik susoqarsimanngilaq. Aamma naak kalaallit illuutaasa aningaasat qanoq qinnutigineqarnissaat pillugu nassuiaasoqarnissaa, isumaginninnermut Nunamilu namminermi ministeeriaqarfimmut piumasaqaatigineqarsimagaluartoq.

- Aningaasaliissutinik suli tigusaqanngilagut, taamaalilluta qanoq aningaasaliisoqarniarnera naluarput, Jørn Holbech oqarpoq.

Tamannalu ajornartorsiutaavoq. Kalaallit Illuutaanni arlalinni - soorlu Odensemi kalaallit Illuutaanni - suliniutinik aallartitsinissamut piareersimasoqarpoq. Aningaasaliisoqartinnaguli aallartitsisoqarsinnaanngitsoq, Odensemi kalaallit illuutaanni pisortap Kirsten Mærskip oqaatigaa.

Taamaattumik Aarhusimi Jørn Holbechip aamma naatsorsuutigaa, aningaasaliissutit qaqugu atorneqarsinnaanerat ministeeriaqarfimmit sivitsuiffigineqarumaartoq.

- Soorlu ukiup taamaalinerani kingusissukkut aningaasaliissutigineqarpata, aningaasat atorneqarsinnaanerinik sivitsuisoqarnissaa neriuutigaarput taamaalillutami aningaasaliissutit atorsinnaaniassagatsigik. Aningaasammi atornissaat kisimi pineqanngilaq. Suliniutinik pitsaasunik siunissami atasinnaasunik inuiaqatigiinnilu akuunerulernissamik periarfissiilluarsinnaasunik aallartitsisoqarnissaa pineqarpoq.

Qinersisoqarnera kinguaattoortitsisoq
Isumaginninnermut nunamilu namminermi pissutsinut ministereqarfimmit nassuiaatigineqarpoq Folketingimut juunimi qinersisoqarnera kinguaattoortitsisimasoq. Ministereqarfiullu neriorsuutigaa aningaasaliissutaasunut qinnuteqaatissat ilitsersuutissallu naammassineqangajalersut.

Aarhusimilu Jørn Holbechip naatsorsuutigaa aningaasat piffissap qanoq ilinerani atorneqarnissaannut piffissaliussaq  Isumaginninnermut nunamilu namminermi pissutsinut ministereqarfimmit sivitsorneqarumaartoq.

- Aningaasaliissutit ukloq taamaalereersaoq tunniunneqarnerisigut aningaasat atorneqarsinnaanerinut piffissaliussap arlaatigut sivitsorneqarnissaa neriuutigaarput, taamaalilluta aningaasat atorsinnaassagatsigit. Aningaasammi kisiisa pineqanngillat. Suliniutinik pitsaasunik aallartisaanissaq akuulersitsiniarnerullu iluani periarfissanik pitsaasunik pilersitsinissaq pineqarpoq.

Ministereqarfimmit oqaatigineqarpoq aningaasaliissutit 2015-imi tunniunneqartut 2016-imi aamma atoqqusaasut.