Danmarki naalliutsitsisartutut nalunaarutigineqarpoq
Naalliutsitsisarnermut akiuiniartartut ilisimaneqarluartut marluusut taama sakkortutigisumik unnersuussinermik saqqummiussisuupput, Inger Genefke, naalliutsinneqarsimasunut katsorsaavimmik ilisimatusarfiusumik pilersitsiniku aamma ilisimatooq Bent Sørensen, ukiuni aqqaneq-pingasuni Naalagaaffiit Peqatigiit EU-llu naalliutsinneqartarsimasut pillugit ataatsimiititaanni ilaasortaasimasoq.
Taama pineqarnera Danmarkimut kanngunartuuvoq, naalliutsitsisartutullu Danmarkimik uanga unnerluussinissara takorloorsimanngisaannarpara. Naalliutsitsisarnerummi akiorniarneqarneranut Danmark nunarsuami sumiiffinni assigiinngitsuni peqataasarnikuuvoq, Inger Genefke oqarpoq.
Danmarkip unnerluunneqarneranut aamma peqataavoq 46-nik ukiulik Abdul Jabar, taanna Irakimiut 22-usut itigartinneqartut ippassaani Danmarkimiit Bagdadimut timmisartuunneqartut ilagaat, Bagdadimilu siusinnersukkut ukiuni arfineq-marlunni naalliutsinneqartarsimavoq. Taanna tikiinnavissoq tigusarineqaqqippoq.
Naalliutsinneqartarsimasunik Danmarkimi naammattoorsisarpugut, taannalu sakkortoorujussuarmik naalliutsitaasarsimavoq qanoq sivisutigisimaneranik nassuiassallugu ilisimanngisannik, kisianni ukiuni arfineq-marlunni naalliutsinneqartarsimallunilu paarnaarussivimmi kisimiitinneqartarsimalluni, taamaammallu naalliuttarsimaqaluni.
Danmark kanngusuutigaara, naalakkersuinikkut suliallit ullumikkut taama aalajangiisartut kanngusuutigaakka. Taama oqarpoq Inger Genefke. Taannalu isumaqarpoq Abdul Jabar nunagisamini sakkortuumik pineqarsimanermi saniatigut ukiumi ataatsimi Danmarkimi paarnaarussivimmi kisimiitinneqarsimanermigut sakkortuusisamik pineqarsimasoq.
