Danmark unioqqutitsisarsimasutut isornartorsiorpaat
Ilaatigut ilaquttanik ataatsimuulersitsisarnermut aamma nunani allamiunut Danmarkimut nunaserusuttunut point-ilersueriaatsimut nutaamut, Danmarkimi malittarisassat atuuttut, ammip qalipaataa patsisigalugu immikkoortitsisarnermut Naalagaaffiit Peqatigiit komitéata, isornartorsiorpai.
Malittarisassat taakku naapertorlugit nunani allamiut ukiuni sisamani nammineerlutik iliuuseqareernermikkut aatsaat Danmarkimi innuttanngortinneqarsinnaapput. Tamatumani ilaatigut piumasarineqarluni qallunaat oqaasiinik pisinnaasanik misilitsinnissaq, ukiuni kingullerni pingasuni pisortanit ikiorsiissutinik pisimannginnissaq, aamma ukiut pingajuisa affaani tamakkiisumik suliffeqarsimanissaq.
Naak taamatut aaqqissuussinikkut nunasisut inuiaqatigiinnut ilanngutitinneqarnissaannik siunertaqartoqaraluartoq, tamatumunnga komité isumaqarpoq, aaqqissuussineq "oqimaappallaarlunilu sakkortuallaanik piumasaqaateqartoq". Tamatumalu kinguneranik qimaasut ilarpassuisa, ukioqqortunertik aamma tarnimikkut atukkamikkut kingunerlutsitsinertik pissutigalugit, piumasaqaatit naammassisinnaasanngikkaat.
Illuatungiliuttut ataatsimoorlutik naalakkersuisut isornartorsiuinermut iliuuseqaqqullugit kajumissaarpaat. Allaammi Line Barfodip Enhedslistemeersup oqaatigaa, Danmarkimi naalakkersuisut - Dansk Folkeparti tapersersuisoralugu - isornartorsiuineq ilumuunnginneraraat. Taamatulli isornartorsiuineq Folketingip inatsisinik atortitsinermut ataatsimiititaliaata siulittaasuata, Peter Skaarupip, Dansk Folkepartiimeersup ilumuunnginnerarpaa.
- Danmarkeeqqami isumaqatigiissutinik sapinngisarput naapertorlugu malinninniartugut pinnata, nunat, arnanik allasiorsimasunik ujaqqanik milloorlugit toqutsiffiusartut aamma nunat inunnik upperisaat pissutigalugu parnaarussisartut, Naalagaaffiit Peqatigiit piffissamik atuiffigisariaqarpaat, Peter Skaarup Ritzauimut taama oqarpoq.
