Danmark TV2 KNR-llu oqallitsitsinerani tatineqartoq
Katuami inersuaq ulikkaangajalluinnarpoq. Kalaallit politikeriisa danskillu politikeriisa KNR-ikkut TV2-kkullu toqqaannartumik tv-kkut aallakaatinneqarnissaannut piareersimapput.
Silatusaartumik oqaaseqartoqaraangat ersaartaattoqarsinnaasoq aaqqissuussisunit aallaqqaammut oqaatigineqarpoq.
Kalaallilli politikerii ersaartaanneqangaarmata aallakaatitassiaq piffissaliussamut naammatsinneqarniassammat ersaartaattut amerlanerpaartaat nunguterneqartariaqarsimapput.
Donald Trumpip Kalaallit Nunaannik aqutsilernissamut kissaateqarluni oqaaseqaqqammernera pissutigalugu oqallinneq aaqqissuunneqarpoq.
Kisianni republikanerit partiiata Donald Trump iluaqutigilluagarigaluaraa oqallinnermi naak tamanit eqqarsaatigineqaraluarluni eqqaaneqanngilaq.
Naalagaaffinngorneq
Naalakkersuisut siulittaasuat, Múte B. Egede (IA) inuiaat naalagaaffinngornissaat qanoq isigineraa aperineqarami ima akissuteqarpoq:
- Kalaallit isumatusaartumik eqqarsarneq ileqqoraat. Niuernerit tamarmik qallunaat nunaatigoortuaannaavissinnaanngillat. Nunarsuarmukartuaannarsinnaanngilagut qallunaat nunaat aqqutigalugu. Maanngaanniit nunarsuarmut nunarsuarlu maannga
Naalakkersuisut siulittaasuata nunatsinni ilinniartitaaneq ukiut 25-t ingerlanerani qaffassasoq, inuussutissarsiorneq pitsaanerusoq kiisalu aatsitassarsiorneq takornarialerinerlu ineriartorneq neriuutigalugit oqaatigai.
Aningaasaqarnermut naalakkersuisup, Erik Jensenip (S) aningaasaqarnikkut namminiilivinneq piviusorsiortutut aamma isigai.
- Nammineersinnaanissarput qularutiginngilara. Danmarkimik USA-millu niueqateqarnerput annertusarneqassaaq, Erik Jensen ilanngussivoq.
Aallakaatitsisulli, Jesper Steinmetzip Naleqqamit Pele Broberg apeqquteqarfiginiarmagu danskit tusagassiorfiisa kalaallit partiivisa isumaat qanoq paasiuminaatsitsitigisinnaaneraat saqqummerpoq.
Namminiilivittoqarsinnaanngitsoq tusarparput. Suleqateqartoqassaaq, imaluunniit arlaatigut atassuteqartoqassaaq. Tamanna isumaqatiginngikkit nalunngilara.
- Sooq, suminngaanniit aamma pissarsiariviuk? Naa, taanna ataasinnguamilluunniit taanikuunngilarput. Taanikuusarput tassaavoq nunarput uagut nammineq pigalugu, sapinnginnatta oqaatigissallugu pigivarput. Kikkut suleqatiginiarnerivut nammineq uagut taanna inississavarput. Taamaammat namminiilivinnissaq eqqartorneqartillugu tassa paasiuminaatsitaat avataaneersut
Tamatuma kingorna Múte B. Egedep arlaleriarluni oqaatigisimasaa uteqqippaa: “Danskiorusunngilagut, amerikamioorusunngilagut, kalaaliorusuttugununa.”
Danmark spiralilersuineq pillugu tatineqartoq
Henriette Berthelsen – arnat spiralilersuisoqarsimanera pillugu danskit naalagaaffiannik eqqartuussivilersuussisut ilaat danskit aallakaatitsivianniippoq.
Taannalu kissaateqarpoq: Ministeriunermit utoqqatsertoqarnissaa.
Ministeriunerli peqataanngimmat nunanut allanut ministerip, Lars Løkke Rasmussenip (Moderaterne) spiralilersuisoqarsimanera qanoq alianartiginersoq oqaatiginiarsaraa. Taannali suli – utoqqatsersinnaanngissorivoq.
- Pissutsinik, tassa inuit pineqartut akuersititseqaarnagit passussisinnaannginermik, atorunaarsitsisunik utoqqatsissummik soqanngilaq.
Lars Løkke Rasmussen arnat spiralilerneqarsimasut tamarmik akuersiteqqaarsimannginneragaammata eqqissisimaniarpoq sunnerneqarnaveersaarlunilu – tamanilli akuersisiteqaarsimannginnerrmik oqarneq TV-p kingusinnerusukkut naqqippaa.
- Kukkuluttoqqajaaleqaanga, kisianni assigiinngisitaarutit taamaasa ilanngutinngikkutsigit iluaqutaanngilaq. Tamarmik akuersisinneqarsimannginnerassallugit tunngavissaaqanngilaq. Pisimasunik qulaasoqalernikuuvoq, taanna oqarpoq.
Konservativini siulittaasoq, Mona Juul allaanerusumik Henriette Berthelsenimut utoqqatserniarsarivoq.
Taassumali oqaaseq 'utoqqatserpunga' atornagu oqaatsit allat atormagit Henriette Berthelsen qisuariarpoq:
- Danskit tungaanniit taama pissusilersuuteqartoqartarnera nalaatikuvara. Ingerlaannarpunga nikanarsaataallunilu. Politikerisut oqaluttoqarpoq. Tamanna uanga arlallit allat maannakkut pisariaqartinngilarput.
