"Danmark, tamaanga killeqarpoq!" taama qulequtserlugu akerliussutsimik takutitsineq

Pernille Benjaminsen akerliussutsimik takutitsinissamut aaqqissueqataavoq, taassuma oqaatigaa kalaallit danskinit nikaginnittumik pineqartarnerisa killilerneqarnissaa siunertaasoq.

- Kingullertigullu nunatta eqqartorneqangaatsiarnerata kingunerisaanik nunarput nuanninngitsunik qularinninniartumillu isigineqarnera ersarissivoq. Tamannalu killilerusupparput, naligiimmimmi pineqarusuppugut, Pernille Benjaminsen taama oqarpoq.

Taassuma, akerliussutsimik takutitsineq politikkikkut – Danmarkimi aammalu nunatsinni – maluginiarneqassasoq, aammalu iliuuseqarfigineqassasoq neriuutigalugu ilanngullugu oqaatigaa.

- Nuanninngitsumik nipilimmik oqallinnernut peqataanngiinnarutta pitsaanerussaaq. Akisariaqartillutalu pissuserissaartumik akissuteqartarnissarput innersuussutigiinnassavara. Tamannali illugiissumik pisariaqaraluarpoq. Isumaqarpunga kalaallit aaqqiissuteqartussatut isigineqarpallaartartut. Tamanna oqimaaqatigiissinneqartariaqarpoq amigaatigineqarlunilu. Taamaammat suleqatigiilluni kivitseqatigiilluni iliuuseqartoqartariaqarpoq, Pernille Benjaminsen oqarpoq.

Akerliussutsimik takutitsineq Nuutoqqami ”Sassuma Arnaa”-ta eqqaaniit nalunaaqutaq 16:30 aallartissaaq, tassanngaanniillu Rigsombudimut Inatsisartunullu ingerlaaqatigiittoqassalluni.