Danmark Sverigemut unammilerpoq
Isikkamik arsarluni Europami pissartanngorniutivinnissamut anngunniuttoqaleruttorpoq, Danmarkilu ullumi unammissaaq.
Akeratoqarsuatik Sverigemeersut unammissaavaat, Stockholmimi Råsunda-p arsaattarfiani arsaattoqassagami.
Unammineq KNR TV-kkut nalunaaqutaq tallimanut qiteqquppat toqqaannartumik aallakaatinneqassaaq.
Sverigelu Danmarkilu kingullermik unammimmata pisimasoq amerlasuunit eqqaamaneqassagunarpoq. Arsaattunik isiginnaariat ilaat arsaattarfimmut iserpoq, dommerilu tilloriaraluarlugu.
Tamanna Danmarkimut kinguneqarnerluppoq. Danmark UEFA-mit pillarneqarpoq 3-0-imillu ajorsartutut suaarutigineqarluni.
Tamanna pissutigalugu Sverigemi arsaattartut kattuffiat isumannaallisaaniarluni arsaattarfimmi paarsisulersuiniarpoq.
TV2-p internetikkut nittartagaani tamanna atuarneqarsinnaavoq.
- Tapersersuisut akornanni aporaattoqarnissaa pinaveersaartinniarput, inuillu eqqissisimatinniarsarissallugit, Stockholmip politiivini oqaaseqartartoq TV2-mut oqarpoq.