Danmark sumiginnaasimasutut EU-imit naveerneqarpoq
Danmarki ullumi EU-parlamentimit mianersoqquneqarpoq, tassa amerlanerussuteqarluartut nalunaarut Danmarkimik isornartorsiuisoq akuersissutigimmassuk. Isornartorsiorneqartoq tassaavoq Danmarkip Pituffimmi sulisartunik timmisartup ukiut 40-t matuma siornagut atombombemik usisup nakkarnerani saleeqataasimasunik, peqqissutsimik misissuinissamut sumiginnaasimaneranut tunngasoq.
Jens Zinglersen Pituffimmi sulisartuusimasut peqatigiiffianni siulittaasuuvoq – taannalu EU-parlamentip aalajangiinera pillugu oqaaseqartipparput.
- Aalajangiineq nuannaarutigeqaarput, kingunerisassaalu misissuataalaaqqaartariaqarpavut.
Isumaqarpunga maanna ukiut 40-ngajalluinnaat qaangiunneranni pissutsinik piviusunik oqaluttuunneqartariaqartugut. Soorlu timmisartorsuaq januaarip 24-anni 1968-imi nakkarmat qaartartut sisamat usisai qanoq atsigisumik radioaktivitaqarnersut.
- Peqqissutsimut ministeri oqarfigerusuppara: Pissutsit piviusut maanna saqqummiunneqarniarlik, qanoq annertutigisumik mingutsitsisoqarnera maanna ukiut 40-t qaangiunneranni oqaatigineqarniarli.
- EU-parlamentimi aalajangiineq pillugu siullermik oqaatigerusuppara suliassap ilungersunartup taama sivisutigisumik ingerlanneqarnera ingasagigakku. Taamaattorli aalajangiineq nuannaarutigeqaarput, tassami kiisami nunat tamat akornanni inuit ilinniarluarsimasut qinikkat Danmarkimut ima oqariartuuteqarmata: Arraa, kusanaatsumik iliuuseqarsimavusi, Jens Zinglersen oqarpoq.
Radiuaviisimiit Danmarkimi peqqinnissamut ministeri Lars Løkke Rasmussen oqaaseqartinniaraluaratsigu ullumikkut iluatsitsinngilagut, neriuppugulli kingusinnerusukkut oqaaseqartissinnaassallutigu.