Danmark prinsesse-taarpoq
- Niviarsiaraq 2.930 grammimik oqimaassuseqarpoq 49 centimeterinillu angissuseqarluni. Pinneqaaq. Sulili siusippallaarpoq oqaatigissallugu kinalisarnersoq. Pinnerami arnisarsimaassaaq, Prins Joachim tulluusimaarluni Rigshospitalimi najorliisimalluni oqarpoq.
Taanna sisamassaanik ataatanngorpoq, aatsaalli panissaarluni.
Ilisimaneqareersutut siullermik nulianilu grevinde Alexandra-lu, prinsit Nikolai aamma Felix erneraat. Prinsesse Marie-lu angajulliliaat - prins Henrik - 2009-mi maajimi inunngorpoq.
Prinsesseeraq inunngortoq dronning Margrethep prins Henriullu ernutaasa arfineq pingajoraat, tassami nukappiaqqanik tallimanik niviarsiaqqanilu pingasunik ernutaqaramik.