Danmark: Piginnittuunerminnik nittarsaassisut illarnarsiinnarput
Per Stig Møllerip tusagassiortunik katersortitsinerani nunat tallimat nunanut allanut ministeriisa sapaatip-akunnerata tulliani naapinnissaat ilisimatitsissutigineqarpoq.
Per Stig Møller naalakkersuisut siulittaasuat Hans Enoksen peqatigalugu Norgemi, Canadami, Ruslandimi aamma USA-mi nunanut allanut ministerinik Qalasersuaq eqqaatalu imartaa pillugu Ilulissani ataatsimeeqatigiinnissamut aggersaanikuuvoq.
- Issittup imaanut sikuanullu nunat qanittut eqqumaffissaqarput, tassalu sikup aakkiartorneratigut umiarsuarsuit Qalasersuup qanitaani angalasalersussat ajornartorsiortitsilersinnaammata, Per Stig Møller oqarpoq.
Annaassiniartoqassatillugu nunat tallimat qanimut suleqatigiilluinnartariaqarnerarpai. Aamma maluginiartariaqarnerarpaa nunarsuup ilaa tamanna avatangiiseqarmat mianereqqissaagassamik.
- Issittup imartaata isumannaannerpaamik, nunallu inuiinut imartami aalisarnermik piniarnermillu ukiuni untritilippassuarni aallutaqarsimasunik ataqqinnittumik imartamik atuilissagutta atuilertariaqarpugut, oqarpoq.
Tartupaluup aamma Canada-p amerikallu nunatai avannaqqullugit imaatigut aqqutip kiisalu russit qalasersuup imaartaata qeqqani erfalasuliinerata aaqqiagiinngissutaanerat suunnginnerarpaa.
- Allamik pinarnerusumik oqaloqatigiissuteqartariaqarpugut, Per Stig Møller oqarpoq.
- Tassaavorlu inatsisit pioreersut malinnissaannik isumaqatigiissuteqarnissaq, nunanut allanut ministeri oqarpoq.
- Qalasersuup nunamut sumut atanera Ruslandip erfalasuliineratigut pisussaanngilaq. Sydafrikami aamma taamaaliorsinnaavoq, pissutsilli allanngornavianngillat. Akersuunnianngilagut, tassami Naalagaaffiit Peqatigiit aalajangersagaat naalagaapput. Taakkulu malillugit 2020 tikitsinnagu nunap sorliup Qalasersuaq pigineraa qulakkeersinnaanngilarput, Per Stig Møller oqarpoq.
Ilulissani ataatsimeersuarneq marlunngornermi pingasunngornermilu pissaaq, soqutigineqangaaramilu tusagassiorfiit 60-t nunanit tamalaaneersut peqataanissartik nalunaarutigereerpaat.
Per Stig Møllerip ilimagaa Ilulissani sapaatip-akunnerata tulliani ataatsimeereernermi nunat tallimat peqataatitaat ataatsimut nalunaaruteqarumaatut.
