Danmark nunarsuarmi nunani peqquserluffiunnginnerpaavoq, Nunarpummi?
0-imit 100-mut uuttortaateqarluni nunat naliliiffigineqarsimapput. Danmark 90-inik pointeqarluni siuttuuvoq, Somalialu pointit arfineq-pingasuinnaat angusimallugit. Ataatsimut isigalugu nunat Europamiittut arlaqarput, pingaartumik nunat Europap kujataaniittut ajornartorsiuteqarlutik.
- Nunat tamarmiusut pingasorarterutaasa uttuutip qeqqani 50-imiinnerat ajorluinnarpoq, nuna Italiatut ittoq 72-inik pointeqarluni inissisimavoq, Grækenlandilu aningaasaqarnikkut ajornartorsiorfiusoq 94-inik pointilerneqarsimalluni - India sioqqutilaarlugu, Transparencyp allaffeqarfiani Berlinimiittumi takussutissalerinermut pisortaq Finn Heinrich oqarpoq.
Misissuinermi nunat 176-it peqataapput, Kalaallit Nunaanni innuttaasut nunartik misissuinermi nassaarisinnaanavianngilaat, Nunarpummi peqataatinneqanngilaq. Tamanna Transparency Greenlandimit iliuuseqarfiginiarneqarpoq.
-Peqquserluttoqarsinnaanerata aarlerinassusaa maani Nunatsinni aamma paaserusupparput. Misissuinermut sakkussat pisariaqartut Transparency Internationalimit pissarsiarisinnarlugit aallartiinnassaagut, Transparency Greenlandimi siulittaasoq Anders Meilvang oqarpoq.
Transparency Internationalip naliliinerata takutippaa apersorneqartut oqartussaasut peqquserluttarnerup akiorniarneqarneranik annertusaasinnaanissaat upperinngikkaat. Misissuineruttaaq takutippaa nunani amerlasuuni naalakkersuinikkut partiit peqquserluttutut isigineqartut.
- Europamiut peqquserlunneq aningaasanut tunngassuseqaannanngitsoq ilisimavaat, inatsisinimmi unioqqutitsinngikkaluarluni ileqqorissaarnikkulli pissusissamisuunngitsumik imminut ikinngutinullu iluaqusersorneq aamma pineqartoq, Finn Heinrich oqarpoq. Taanna isumaqarpoq pingaartumik partiinut tapiissutit paasisassaanngitsut innuttaasunit ajornartorsiutitut annertuutut isigineqartut.
