Danmark mianersoqqussummik tunineqarataannaavoq
EU-kommissionen-ip Danmarki naggammik mianersoqqussummik ullumiikut tunivaa. Taamatut ingerlasoqaannarsinnaanngilaq, naalagaaffiup Danske Spil kisiat aningaasanoortitsinernik kisermaassisussaatissanngilaa – siornatigut Danske Spil ”Tipstjenesten”-imik taaguuteqarsimagaluarpoq.
Danmark-ip aningaasanoortitsisarnermik kisermaasissussaatitaaneq iluanaarutaasaqisoq atorunnaarsinngippagu EF-p eqqartuussivissuanut suliassanngortitsisoqassaaq. Sioorasaarinerulli naalakkersuisut siooralersinngilai.
Danmarki EU-kommission-imiit mianersoqqussutinik marlunnik tunineqareerpoq. Maannakkullu tassa naggammik EU-p eqqartuussivissuanut eqqartuussisulersuinissamut Luxembourg-imi ingerlanneqartussami mianersoqqussummik tunniussisoqarpoq. Eqqartuunneqarnissaq allaqqussinnaajunnaarpoq, Danmark-illu nunat imminermisut pineqarsimasut; Sverige, Finland Ungarn-ilu aninguiniarluni suleqatigisariaqarpai !
Sunaana eqqartuussisulersuiniarnermi pineqartoq?
Aap uani milliard-it pineqarput. Danske Spil-ip ukiumut 10 milliardi koruunit kaaviaartittarpai, internet-ikkullu aningaasanoortarnerit aamma milliard-it arlallit atorneqartarput. Danske Spil-ip iluanaarutinit sinneqartoorutit, timersornermut, peqatigiiffilerinernut siunertanullu allanut atugassanngortittarpai, inatsisilerinerli eqqarsaatigalugu nunap iluani niuffannerup kiisalu kiffaanngissuseqartumik niuernikkut ingerlassinissamik mattunneqarsinnaanerit eqqarsaatigineqanngillat, isertitassammi allat akileraarutitigut akittuutitigullu aaneqarsinnaagaluarput. Qallunaat naalagaaffiata aningaasanoortitsisarnermik kisermaassisussaati-taanerup Danmark-imit ingerlatiinnarneqarnissaanut tunngavilersuutigaa, nunat allat Danmark-imi aningaasanoortitsinermik ingerlatsisinnaalissaga-luarpata tamanna pinerlunniarnerit amerleriaateqar-nissaannik kiisalu inuit aningaasanoorajuut amerleriarnerannik kinguneqaannartussaassammat. Tamaattumillu qallunaat naalagaaffiata Danske Spil-ip kisermaassisussaatitaanerata ingerlaannarnissaa killissaa tikillugu illersorniarpaa.
Inatsiseqarnikkut ilisimatooq Danmarkimeersoq naliliivoq; qallunaat EU-p eqqartuussivissuani suliamut atatillugu ajorsartitaanginnariaasut – qallunaat kisermaassisussaatitaanerat atorunnaassagaluarpat tamatuma kingunerissavaa, nunat allamiut Danmark-imi aningaasanoortitsisinnaalernissaannik.
