Danmark-imi anorersuarneratigut qarsutsineqarpoq
Allattoq Jaaku Lyberth
Danmark-imi sumiiffinni arlalinni qarsutsisoqarnera pissutigalugu upalungaarsimasuutitat ulappupput. Danmark-imi tamarmi unnuaq anorersuarpoq tamatumalu kingunerisaanik umiarsuliviit sapusiallu qarsutsiffiupput. Jylland-ip kangiani Århus-ip eqqaani Limfjord-illu eqqaani ajornartorsiortoqarnerpaavoq, Løgstør eqqugaanerpaasimalluni.
Tamaani imeq pisarnermit miiterialunnik qaffasinnerusimavoq. Umiarsuliviup tungaanut aqquserngit matoqarsimapput. Unnuaru ulinnerunissaa naatsersuutigineqarpoq. DMI mianersoqqussumik nalunaaruteqarpoq unnuaru nunami tamarmi ulinnerpaanersaa naatsersuutigineqarmat.