Danmark anngunniutivinnermi peqataassaaq
Assammik arsarluni Europami pissartanngorniunnerni, Norgimi ingerlanneqartuni ullumi unammisoqarmat, kikkut ajugaaniutivinnissamut anngunnersut paasinarsivoq.
Allattoq Elisa Isaksen
Danmarki Sloveniamut 28 – 23-mik ajugaavoq, gruppe I-imilu normu 1-itut inissilluni.
Gruppe II-mi Tyskland aamma Sverige unammimmata Tyskland 31 – 29-mik ajugaavoq. Tyskland taamaalilluni gruppe II-mi ajugaavoq, Danmarkilu arfininngorpat anngunniutivinnermi siullermi unammissallugu.
Tamanna pissanganassaqaaq, tassami Tyskland nunarsuarmi pissartaammata.
Anngunniutivinnerit KNR TV-kkut arfininngorpat aallakaatinneqassapput, sapaatiuppallu pissartanngorniutivittoqassaaq.
Danmarkip Tysklandimut arfininngorpat unamminissaa ullaap tungaani ulloqeqqanut tanneq tallimanut aallartissaaq.