Danmark Afghanistanimi sakkutooqarfimminiit tunuartilerpoq

Aviisi Politiken ima aamma allaaserisaqarpoq:

Nunap immikkoortuani Helmandimi illoqarfiup Gereshk-ip avannaani qoorumi kuussualimmi Talibanit nakkutiginninnerat qallunaat sakkutuuisa iliuuseqarfigisinnaanagu paasereerpaat. Qooqqumi tamaani qallunaat sakkutuuisa akiunneranni ukiuni kingullerni pingasuni qallunaat 23-t toqutaapput amerlaqisullu sakkortuumik ikilerneqarlutik.

Københavnip Universitetiani sakkutooqarnermut immikkut ilisimasalik lektor Peter Viggo Jakobsen isumaqarpoq, taamatut nassuertariaqalerneq qallunaat sakkutuuinut ilungersunartuusoq.

- Nunap ilaa tamanna aammik, kiagorulunnernik, qullilinernik sakkutuullu inuunerinik naleqarsimavoq, taamaattumillu ajugaaffigineqarusulluni. Kisianni ajugaaffigineqarsinnaanngitsumut sakkutuulersortuarnissaq siunertaqanngilaq, Peter Viggo Jakobsen oqarpoq.

Sakkutuut naalagaasa annerit ilaat Jørgen Høll, sakkutuut qullersaqarfianni immikkoortortami pisortaasoq, isumaqarpoq sakkutuut allamut nuunneqarnissaat pisariaqartinneqartoq.

- Qallunaat sakkutuui siusinnerusukkut sakkutooqarfinni assiginngitsorpassuarniittarput assiginngitsorpassuarnillu isumagisassaqartarlutik. Ataatsimoortinneqalernissaat maanna kissaatigaarput. Tamanna nukittunerulernerannik sungiussinerunerunerannillu kinguneqassaaq. Suliassarput allannguuteqanngilaq, Jørgen Høll oqarpoq.

Illersornissamut ministerip Gitte Lillelund Bechip allannguutit "sakkuut nalilersuinermikkut aalajangiinerigaat" oqaatigaa.

- Tamakkununnga tunngasut politikkikkut aalajangiiffigineq ajorpavut. Periaaseq allanngortinneqarpoq, nunamilu pineqartumi sakkuutuut naalagaasa, sakkutuut sumut inissinneqarnissaat aalajangiiffigisarpaat, illersornissamut ministeri Politikenimut taama oqarpoq.