Dankortimut akit nutaat Kalaallit Nunaannut sunniuteqassanersut ilisimaneqanngilaq
Akit qaffariaataat Dankortit pillugit isumaqatigiissuutip 2005-imeersup kingunerai. Taakkua malillugit aningaaseriviit akiilisitsisarnermut kiffartuussiviat PBS akinik qaffaasinnaavoq, taamaalillutillu aningaaseriviit aningaasartuutimik affaat matussuersinnaalissallugit ullumikkut 25 procentiinnaat matussusertinneqartaraluartut.
Niuertarfiit aningaaseriviillu ukiarmi ilusissaq pillugu isumaqatigiinniarlutik misiliigaluarput, tamannali iluatsiffiunani.
Tamanna pillugu aningaasaqarnermut inuussutissarsiornermullu ministerip Lene Espersernip partiit peqatigalugit Dankortit pillugit isumaqatigiissummi 2005-imeersumi akiliisarnissamut ilusiliussaq katiterpaa tamatumani pisiniarfiit anginngitsut eqqarsaatigalugit. Tassa imaappoq, Dankortinik atuinermut akiliut annertusissaaq, niuertarfiit Dankortimik atuineq qanoq akulikitsigisumik atorneraat najoqqutaralugu.
Kisiannili pisiniarfinnut annerpaanut equngasumik eqquissasut Dansk Erhverv uparuaavoq.
- Tamanna paatsuuinerulluinnarpoq, tassami akiliummut kortimik tigusisartut ikittuinnarnillu nuussaqartartut tassaaginnartariaqanngillat pisiniarfiit mikisunnguit. Tamatumani akerlianik pisoq tassa, biileerniaq, kigutilerisoq, pinnersaataarniaq nakorsarlu ikittuinnarnik nuussaqartartut eqqorneqassanngimmata akerlianilli niuertut pisiniarfissuillu akileraarusersorneqalerlutik, Jens Klarskov nalunaarpoq, taassumalu qularutiginngilaa akitsuutit qaffanneqarnerat kikkut akiligassarilissaneraat. - Tassa atuisartut, taanna erseqqissaavoq.
Dankortimut akit nutaat Kalaallit Nunaannut sunniuteqassanersut ilisimaneqanngilaq- Grønlandsbankip pisortatut oqaaseqartartua Martin Kviesgaard oqarpoq Dankortit pillugit nutaamik isumaqatigiissut pillugu suli ilisimatinneqarsimanani taamaattumillu maannakkorpiaq pisiniarfinnut akit qaffaatissaat pillugit Grønlandsbanken qanoq isumaqanersoq oqaatigisinnaanagu.
Dankortit pillugit isumaqatigiissummut 2005-imeersumut atatillugu Grønlandsbankenip danskit suleriaasiat malinniarlugu aalajangerpoq.
