Damaskus-imit qimarngutitsineq ingerlallualeruttorpoq
Danskinik Syria-p illoqarfiisa pingaarnersaanit Damaskus-imit qimarngutitsineq ingerlallualeruttorpoq, timmisartunik amerlanernik ualimut Danskit nunanut allanut ministereqarfiat attartoreertorlu.
1200-t aqagu angerlaanneqarnissaat ilimagineqarpoq, Danskit nunanut allanut ministereqarfiatalu tullinnguullugu suliariniarsarisussanngorpaa Libanon-ip kujataani danskit ingerlaqqinnaveeqqasut angerlartinniarnissaat. Danskit nunanut allanut ministereqarfiata danskit Libanon-ip kujataaniittut umiarsualiveqarfimmut Saida-mukaqquaai. Tassani katersuuffimmik allamik pilersitsisoqarpoq.
Saida-mi inuit 260-t missaaniittut utaqqipput, sulilu amerleqqissinnaallutik. Ajornartorsiutaaginnalerporlu Beirut-iliaannissaat, Beirut-imiit bussinit Damaskus-iliaasunut ilaasinnaaniassammata.
Nunaannarmi aqquserngit aqqutigalugit Beirut-iliaakkusunneruagut nunalli atortulersugaanerata tamanna ajornakusoortippaa. Apeqqutaavortaaq Israel-imiut saassussinnginnissamut neriorsuuteqaqqissinnaanersut.
Bussinik naammattunik, aqqutissarititaasunilu ingerlasinnaasunik, pissarsigutta Beirut-iliaassuisinnaanngussaagut, Danskit nunanut allanut ministereqarfiat nalunaarpoq. Naalagaaffiit Peqatigiit Danskit nunanut allanut ministereqarfiata Libanon-ip kujataanit angallassinissaanik ikiorniarpaa, Israel-imiut saassussinnginnissamik neriorsuuteqassappata. DR-imit ilanngutassiaq Tikaajaat Kristensen-ip kalaallisuunngortippaa.
Nunat pisuujunerit innuttaminnik Libanon-nimit qimarngussileruttortut, nunat piitsuunerit innuttaminnik qimarngutitsinissaminnut ikioqqupput.
Nunat piitsuunerit ikiuiniaqatigiiffinnut assigiinngitsunut saaffiginnissimapput innuttatik angerlartinnissaannut ikioqqullutik. Nunat ikioqqusut ilagaat, Bangladesh, Filippinerit Sri Lanka-lu. Naatsorsuutigineqarpoq Sri Lanka-miut 80.000-t missaanniittut Libanon-nimi suliffeqartut.
