Daltonikkut pinerlunniartarnerinut assingusumik tillinniartarput

Alluitsup Paani Pilersuisup quersuani 2006-imi tillinniaqattaarnerit inuusuttunit sisamanit peqataaffigineqartut, Dalton-ikkut pinerlunniartarnerinut assersuullugit unnerluusisoq Nanortallip politeeqarfianeersoq Asger Hansen Qaqortumi eqqartuussisoqarmat oqarpoq.
marsip 12-at 2008 16:54

Inuusuttut 29-nik, 30-nik, 31-nik aammalu 22-nik ukiulik eqqartuunneqarput, sisamariarlutik ilaatigut quersuaq ikuttaammik kuupiimik putullugu tillinniartarsimasutut eqqartuunneqaramik tamarmik miserrateqanngillat.

Eqqartuunneqartuni marluk annersaasarsimanertik pillugu saniatigut eqqartuunneqartut, sakkortunerusumik pineqaatissinneqarput.

Taakkununnga ilaavoq Siumup inuusuttunut suleqatigiiffiani SIS-mi siorna piffissami sivikitsumi siulittaasunngoraluartoq, Naalakkersuisut siulittaasuata ernera, Kristian Enoksen.

Taanna marloriarluni annersaasimasutut, marloriariarlunilu tilliniartarsimasutut, qaammatini tallimani pineqaatissinneqarsimasunut inissiisarfimmiittussanngortinneqarpoq. Aamma alla 22-nik ukiulik tillinniaqattaartarsimasutut annersaasimasutullu qaammammi ataatsimi pineqaatissinneqarsimasunut inissiisarfimmiittussanngortinneqarpoq.

Tillinniaqataasarsimasut allat marluk akiligassinneqarput, saniatigut ukiumi ataatsimi, alla ukiuni marlunni, nakkutigineqartussanngortitaallutik.

Eqqartuunneqartut Pilersuisumut aningaasarpaalunnik saniatigut taarsiisussanngortitaasut tamarmik pineqaatissinneqarnerminnut akuersipput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq