Cykilinik tillittoq torrallaariaraluarpoq

Angulli ataaseq arfininngormat ingasattajaarpoq, meeqqap cykelianik tuniniaagami.

Tassami sanioqquttut ilaata meeqqap cykelia tuniniarneqartoq ilisaraa. Paniatami cykelia qanittukkut tillinneqarsimavoq. Politiit arnap kalerrippai, arnallu uppernarsarmagu cykeli panimmi pigigaa, cykeli arnamut utertinneqarpoq, angutillu – tillissimanini pissutigalugu unnerluutigineqarnissani akiliisitaanissanilu ilimagisinnaavaa.

Arnap 21-nik ukiullip aamma taama pineqarnissani ilimagilluarsinnaavaa, taanna tillinnini pissutigalugu unnerluutineqassagunavippoq, taavalu allamik suliffissarsiortariaqassalluni.

Arnaq Nuummi neriniartarfiit ilaanni sulisuuvoq, sapaatiummallu ullaakkut soraarami aalajangerpoq immiaaqqanik karsinik arlalinnik angerlaassiniarluni. Neriniartarfimmi aningaasat karsimiittuutit tamaasa aamma tillippai.

Innuttaasulli ilaat eqqummaarikkallartilluni politiinut kalerriivoq, arnarlu 21-nik ukiulik fiisteqataalu politiinit tigusarineqarput, politiillu allannerattut, immiaaqqat tillitat amerlanersaat neriniartarfimmut utertinneqarsinnaasimapput.

Arnaq unnerluutigineqartussanngorpoq, kammalaataalu tillikkanik imeqataasimanertik pillugu aamma unnerluutigineqassallutik.