PANAM Cubamiut tikinngitsoortut
Amerikap nunavittaaneersut assammik arsarluni pissartanngorniunnerat Nuummi ullumi arfinngornermi aallartipput.
Unamminerlu siulleq taamaatiinnarneqartariaqarsimavoq, Cubamiut tikinngitsoorlutik nalunaaruteqarmata, tamannalu pillugu aaqqissuisut tallimanngornerup unnukkuani nalunaarfigineqarput.
- Cubamiut timmisartumut attartukkamut ilaasinnaasimanngillat, Canadakkoornissamut akuersissuteqanngimmata. Cubamiut nammineerlutik Europakkoorlutik angalaniarsimagaluarput tamannali iluatsissimanngilaat, sunarpiarli pissutaanersoq annerusumik ilisimatitsissutigineqanngilaq, PANAM2018-imik ataqatigiissaarisoq Poul Petersen oqarpoq.
Pissartanngorniunnerit aallartinneranit ullut siulliit pingasut Cubamiut unammeqataasussaagaluarput, unammiffissallu taamaatiinnarneqassallutik.
Cuba ajorsartutut inissinneqassasoq
- Holdit aqqaniliinnanngorput, unamminerit aallartinneranit ullut pingasut ingerlanerini unamminerni Cubamiut Guatamalamut, Perumut Argentinamullu unammisussaagaluarput, unamminissallu taamaatinneqarlutik, Poul Petersen oqarpoq nangillunilu:
Programmi allanngussanngilaq, unammisussat sinneri pilersarutit malillugit ingerlanneqassapput, Cubap unammiffissaralui ajorsartutut suaarutigineqassaannassapput, Poul Petersen oqarpoq.
Pissartanngiunnerit KNR-TV-ikkut isiginnaarneqarsinnaapput, arfininngornermilu unnukkut qulingiluanut nunatta unammisartuisa Columbiamiut unammissavaat.
