Cubami tigusat ilaat iperagaasinneqarput

Fidel Castrop Cubami ukiorpassuarni præsidentiusimasup 2008-mi tunuarnerata kingorna qatanngutaa Raul Castro pissaanermik tigusisoq siuttoralugu, taamaalilluni parnaarussanik iperagaatitsinerit annersaat pivoq.

Iperagaasitsineq pivoq Spaniap nunanut allanut ministeria Miguel Angel Moratinos Raul Castromik oqaloqateqartareersorlu. Taamaammat Moratinos nuannaarpoq.

- Iperagaasitsineq naammagisimaaqaarput. Cubami ullut nutaat atuutilernerannut ersiutaavoq. Nunap ingerlatsineranut akerliusunik parnaarussisarneq qaangeriartuaarneqarpoq, Spaniami nunanut allanut ministeri nutaarsiassaqartitsivimmut AFP-mut oqarpoq.

Cubami politikki tunngavigalugu tigusat 170-it ilaat, atukkatik nunarsuarmioqatigiinnut malugeqqullugit ukiuni kingullerni neriumajunnaartarput, taamaalilluni Cubami ingerlatsinermik uparuartuisartorsuartut ilisimaneqartoq Orlando Zapata Tamayo ulluni 85-ini neriumajunnaaqqareerluni februaarimi toquvoq. Tigusap allap Guillermo Farinas-ip ulluni 130-ni neriumajunnaaqqanini toqqutingajajalluinnarpaa.

Cubami pisut nunarsuarmioqatigiit eqqumaffigilereerpaat, taamaammat Cubami tigusanik iperagaasitsineq maanna aqutsisut - politikkikkut kukkussuteqarsimanermik nassuerutiginninnerattut aamma nalilerneqarpoq.

Copenhagen Business Schoolimi Cubami ingerlatsinermik ilisimatooq Jan Gustafsson isumaqataavoq:

- Cubami naalakkersuisut nunarsuarmioqatiminnut attaveqaatiminnik pitsanngorsaanialersut malunnarpoq, Jan Gustafsson Ritzauimut oqarpoq.