Cubami allatut ingerlatsisoqarnialerpoq
Cubami kommunistiussuseq naapertorlugu naalakkersuineq qeratavallaarunnaarsinniarneqarpoq.
Allattoq Elisa Isaksen
Raul Castro, angajuminik taarsiilluni præsidentinngoqqammersoq isumaqarpoq, innuttaasut tamarmik assigiimmik aningaasarsiaqartitaanerat assigiinngitsunik aningaasarsiaqarsinnaanermik taarsertariaqalersoq, sulisartullu suliffimmik sinneqartoorutaannit agguagarsitinneqartalissasut.
Kommunistit 1959-imi mumisitsimmata Cubamiut tamarmik assigiimmik aningaasarsiaqartinneqalerput.
Cubami pissutsit allanngoriartulernerat taamaalilluni malunnarseqqissaaq, ungasingitsukkummi Cubamiut oqarasuaatinik angallattakkanik qarasaasianillu pigisaqarsinnaanerat ajornarunnaarsinneqarpoq.