Nappaatip toqussutaasartup timillu sananeqaataatigut kingornguttagaasup CTD-p Savalimmiuni innuttaasut annilaarsimatippai. CTD nappaataavoq qaqutigoortorujussuaq, Savalimmiuniunngitsorli, tamanna nutaamik ilisimatusarnermi DR 21 Søndag-ip ippassaq oqaluttuaani erserpoq.
CTD ilaatigut inuusuttut tassanngaannaq uppillutik toqussutigisarpaat. Timip sananeqaataani kingornguttakkat kukkuneqarnerat pissutigalugu stoffi karnitin amigaataasarpoq timillu orsoq nukissanngortissinnaasarnagu. Tamanna uummatip uneriataarneranik kinguneqarsinnaasarpoq.
Nunani allani inuit 100.000-iugaangata ataasiinnaq CTD-mit eqqorneqartarpoq. Savalimmiuni tamatumani inuit 500-gaangata inuk ataaseq eqqorneqartarpoq.
Taamaattumik savalimmiormiut tamarmik misissorneqartussanngorput. Innuttaasut tamarmik - 48.000-iusut - qinnguartarlugit misissormeqarnissaminnik neqeroorfigineqarput. Manna tikillugu inuit pingasuugaangata ataaseq misilittarneqartarpoq.
Savalimmiunili ajornartorsiut maani Kalaallit Nunaanni ima nutaatigaaq peqqinnissaqarfiup savalimmiormiunut maaniittunut qinnguartaanissamik neqerooruteqarnissani piareersimaffiginagu.
- Suli suleriaaseqanngilagut, tamannali sapinngisamik piaarnerpaamik isumagissavarput, nakorsaaneq Karin Ladefoged radioaviisimut oqarpoq.
- Savalimmiormiunut maani Kalaallit Nunaanniittunut qinnguartaanissamik pilersaarut qanoq aallartissanerlugu sapinngisamik piaarnerpaamik eqqarsaatigissavarput. Qaammat ataaseq qaangiuppat suleriaasissarput piariissaaq, nakorsaaneq oqarpoq, peqatigitillugu oqaatigalugu kalaallini inuiaqatigiinni CTD-mik nappaatilinnik nassaarsimanngisaannarlutik.
Danmarkimi ukiuni 30-ni qallunaat taamaallaat marluk taamatut nappaatillit nassaarineqarsimapput. Savalimmiunili oqartussaasunit inuit 100-ngajaat CTD-mik nappaatillit qaammatini qassikattaannannguani nassaarineqarput. Maanna taakkua saniatigut karnitin-imik inuunerminni annassutigisinnaasaminnik akiuussutissalerneqarput.