Covid-19-imut nunatsinni akiuussutissiissutaasoq pillugu ilisimasaqarnerulerit

Covid-19-ip siaruatsaalinissaanut akiuussutissaq nutaaq EU-p sapaatit akunneranni uani pingasunngornermi akueraa. Aakiuussutissaq taanna Modernameertoq coronamut akiuussutissat EU-mit akuerineqartut aapparaat.

BioNTechip akiuussutissaliai akuerineqaqqaartuupput. Taanna nunatsinni peqqissutsimut oqartussat Nuummi Ilulissanilu akiuussutissiissutigigallarpaat. Akiuussutissat taakkua Danmarkimit nunatsinnut sapaatit akunnerata siuliani tikipput.

Danmarkimi peqqissutsimut aqutsisoqarfiup covid-19-imut akiuussutissiinermut maleruagassiat pillugit nalunaarusiaq juullinngitsiartoq saqqummiuppaa. Pfizerip BioNTechillu akiuussutissaliaat taakkualu coronavirusimik qanoq siaruatsaaliisinnaatiginersut nalunaarusiami tassani nassuiarneqarpoq.

Tamakku pillugit uani paasisaqarnerusinnaavutit: 

Akiuussutissaq EU-mit akuerisaq

Tysklandimi nakorsaasiorfissuaq BioNTech Amerikami nakorsaasiorfissuaq Pfizer suleqatigalugu taassuminnga akiuussutissaliortuuvoq. Akiuussutissaliaat EU-mit 2020-mi decembarip ulluisa 21-anni akuerisaavoq. Taanna immikkut ittumik piumasaqaatitaqarluni nioqqutissiarineqarpoq. Taanna naartusut milutsitsisullu eqqaassanngikkaanni 16-inik ukiulinniiit akiuussutissiinissamut akuerisaavoq.

Nunat tamalaat peqqissutsimut suleqatigiiffiata, WHO-p, covid-19-imut akiuussutissaq nutaaq Tozinameranimik atserpaa. 

Tamakkiisumik akiuussuserneqarnissamut marloriarluni kapitissimasariaqarpoq. Akiuussuserneqaqqaarnermiit ullut 21-t 28-llu akornanni kapiteqqittoqartarnissaa innersuussutaavoq.

AAMMA ATUARUK Nakorsaaneq akiuussutissap akuersissutigineqarnerani: - Kalaallit Nunaannut nutaarsiassatsialaavoq

Akiuussutissaliaat taanna tunillaattartunik tunillaannerluunniit ajortunik viruseqanngilaq. Taamaammat akiuussuserneqareernermi aseruuttoornissaq aarlerinaateqanngilaq. Akiuussutissarmi taanna immikkuullarilluinnartumik pilersitaavoq. Taanna timip sananeqaataanut ingerlatitseqqiisartunik sananeqaammut ilisarnaateqartoq, Københavns Universitetip nakorsaasiornermik ilisimatusarnermut immikkoortortaqarfiani professori, Camilla Fogeed, DR-imut oqarpoq.

Akiuussutissap taassuma timi covid-19-imiittumik spike-proteinimik taaneqartartumik kapuutaasartaqalersissinnaavaa.

- Timi spike-proteinemut taamaalilluni akiuussinnaalertarpoq, Camilla Foged DR-imut oqarpoq.

Akiuussutissap sunniutaanik misissuineq

BioNTechip akiuussutissaliaata sunniutaanik misissuinerit immikkoortunut marlunnut avinneqarput. Inuit misiligutaasut eqimattanut marlunnut avinneqarput, eqimattallu aappaaneersut marloriarlutik akiuussuserneqarlutik, sinnerilu marloriarlutik nakorsaataasuusaaserneqarlutik.

Covid-19-imut akiuussuserneqarlutik misiligutaasut katillutik 18.198-iupput, taakkunanngalu arfineq-pingasut covid-19-imik tunillanneqarsimasut uppernarsineqarpoq. Nakorsaataasuusaaserneqarlutik misiligutaasut katillutik 18.325-upput, taakkunanngalu 162-it covid-19-imik tunillanneqarsimasut uppernarsineqarpoq.

Misiligutaasut tunillanneqarsimasut amerlassusaasa assigiinnginnerat akiuussutissap 95 procentimik tunillatsaaliisuuneranut naapertuuppoq.

Tunillatsiuissuseqalersitsinersoq suli akissutitaqanngitsoq

Tassa imaappoq, akiuussutissap akiuussutissinneqartoq covid-19-imut ilumut tunillatsaalineraa uppernarsarneqanngilaq. Akiuussutissinneqarsimagaluaraanniluunniit tunillatsittoqarsinnaallunilu napparsimalertoqarsinnaavoq. Tamannali qaqutigoortuussasoq, Danmarkimi peqqissutsimut aqutsisoqarfiup nittartakkamini ilisimatitsivoq. 

Taamaammat akiuussutissaq inunnik allanik ilumut tunillaassuinaveersaartitsinersoq erseqqissumik oqaatigineqarsinnaanngilaq. Akiuussutissaq Covid-19-imut akiussuserneqartumut sivisuumik tunillatsiuissuseqalersitsinersoq, tunillatsiuissuserluunniit qanoq sivisutigissanersoq maannamut ilisimaneqanngilaq.

AAMMA ATUARUK Coronamut akiuussusiisoqaleruttorpoq: Nuummi kapitittoq siulleq

Akiuussutissaq allanik sunniuteqarsimasinnaavoq. Tamakku tassaapput sunniutit allat nalinginnaasut, soorlu kapitiffikkut ippigusunneq, qasulerneq niaqorlunneq kissarneqarnerlu. Tamarmilli ingasanngitsumik ullualuinnarnilu.

Modernap akiuussutissaliaa  

Sapaatit akunnerani uani nutaamik akiuussutissaqalerpoq. Taanna nakorsaasiorfissuarmit Modernamit akiuussutissaliaavoq, taannalu Pfizerip BioNTechillu akiuussutissaliaatuulli marloriarluni pisassaavoq. Taanna 94,1 procentimik tunillatsaaliisartutut nalilerneqarpoq.

Modernap akiuussutissaliaa 20 gradinik nillertigisumi qerititsivimmiituutigineqassaaq, BioNTechillu akiuussutissaliaat 60-80 gradinik nillertigisumi qerititsivimmiittuutigineqassalluni. Modernap akiuussutissaliaa Pfizerip BioNTechillu akiuussutissaliaattulli immikkuullarilluinnartumik pilersitaavoq.

Modernap akiuussutissaliaa passukkuminarnerullunilu paariuminarnerusoq, nunattalu sinneranut peqqissutsimut oqartussanit nassiussoruminarnerusoq, nunatta nakorsaanera Henrik L. Hansen KNR-imut oqarpoq. Akiiuussutissanilli taakkuninnga nunatsinnut qaqugu tikittoqassanersoq ilisimaneqanngikkallarpoq. 

Tusarfik: Danmarkimi peqqissutsimut aqutsisoqarfiup covid-19-imut akiuussutissiinermut maleruagassiaa.