Coronavirusimut Kinami upalungaarsimanerit sakkukillineqartut
Nualluummut coronavirusimut Kinami nunap immikkoortuini arfinilinni upalungaarsimanerit sakkukillineqarput.
Nunap immikkoortuini marlunni upalungaarsimanerit tallimanngormat aallaqqaammut sakkukillineqarput, nunallu immikkoortuini allani sisamani upalungaarsimanerit unnuaq sakkukillineqarlutik. Kinami peqqinnissaqarfik taama nalunaaruteqarpoq.
Nualluummik Kinami tunillanneqarsimasut katillugit 76.936-usut, Kinami oqartussat nalunaarutigaat.
Amerlanerit nunap immikkoortuani Hubeimi tunillanneqarsimapput, coronavirusilu tassanngaanniit tuniluutilerneqarsimassasorineqarpoq.
Sakkukilliliineq tunuartinneqartoq
Inuit tunillanneqarsimanngitsut illoqarfissuarmit Wuhanimit qimagussinnaasut siullermik nalunaarutigineqarpoq, tamannali kingorna tunuartinneqarluni.
Kinami peqqinnissaqarfik aatsaat taama unammilligassaqartigisoq Kinap præsidentiata, Xi Jinpingip ippassaq oqaatigaa.
Virusip tuniluutilinnginnissaanut suliniutit iluatsikkiartorput, suliarli aatsaat aallartittoq Xi Jinpingip oqaatigaa.
Inuit 2400-nit amerlanerusut nualluummik Kinami toqquteqarsimapput.