Coronavirusimik tunillatsissimasut ataasinngornermi 914-iupput, tunillatsissimasutullu paasineqartut taamaalillutik 46-nik amerlillutik. Coronavirusimillu toqquteqartutut nalilerneqarsimasut maanna sisamaapput.Assi: Henning Bagger/Ritzau Scanpix

Coronavirusimik Danmarkimi toqqutillit sisamaasut tunillatsissimasullu 960-iusut

Coronavirusimik Danmarkimi tunillatsissimasut 960-inngorsimasut marlunngornermi nalunaarutigineqarpoq.

Danmarkimi Statens Serum Institut nittartakkamini taama ilisimatitsivoq.

Coronavirusimik tunillatsissimasut ataasinngornermi 914-iupput, tunillatsissimasutullu paasineqartut taamaalillutik 46-nik amerlillutik.

Coronavirusimillu toqquteqartutut nalilerneqarsimasut maanna sisamaapput.

Utoqqaat marluk, aappaa 80-inik ukiulik aappaalu 81-inik ukiulik, Herlevip napparsimmaviani uninngasut sapaatip akunnerata naanerani toqusimasut, Region Hovedstadenip siusinnerusukkut ilisimatitsissutigaa.

Tamatuma saniatigut alla tunillatsissimasoq Jyllandip avannarpasissortaani sapaatip akunnera kingulleq paasineqarpoq, tunillatsissimasorlu angutaavoq 80-inik ukiulik Aalborgip napparsimmaviani uninngasoq, taannalu tunillatsissimasoq toqunerata kingorna paasineqarpoq.

Angut 92-inik ukiulik Aarhusimi utoqqaat angerlarsimaffianni Hørgårdenimi najugalik toqusimasoq, Aarhus Kommunep ataasinngornermi ilisimatitsissutigigaa, Danmarkimi nutaarsiassaqartitsivik Århus Stiftstidende allappoq.

Utoqqaat angerlarsimaffianni tassani sulisoq coronavirusimik tunillatsissimasoq siusinnerusukkut uppernarsineqarsimavoq.

AAMMA ATUARUK Dronningi coronavirus pillugu ullumi nalunaaqutaq 16 oqalugiassasoq

Statens Serum Institut naapertorlugu coronavirusimik toqquteqartut amerlassusaasa marlunngornermi aatsaat nalunaarutigineqarnerat, toqusoqarsimaneranik cpr-normunik nalunaarsuinermi kinguaattoortoqarneranik pissuteqarpoq.

Nualluummik coronavirusimik tunillatsissimanerup kingunerisaanik nappaat Covid-19 toqqutaasimasariaqanngitsoq, Statens Serum Institutip ilanngullugu ilisimatitsissutigaa.

Taamaattumik inuit coronavirusimik tunillatsissimasut nualluummik taassuminnga toqquteqarsimasariaqanngitsut uppernarsineqarpoq.

Kisitsisit tunillatsissimasut amerlassusaannut tunngasut nangaanartoqartinneqassapput.

Tamanna misissugassanik tigusinermi periutsimik allannguisoqarnera pissutigalugu peruluttut taamaallaat coronavirusimik tunillatsissimanermik misissorneqartarnerannik pissuteqarpoq.

Taamaattumik tunillatsissimasut amerlarujussuussangatinneqarput.

Inuit 62-it coronavirsumik tunillatsissimasut unitsitaasimasut, Danmarkimi oqartussaasut ataasinngornermi ilisimatitsissutigaat. Taakkunannga qulit perulummata peruluttunut immikkoortortami uninngapput.

Coronavirusimik tunillatsissimasut Savalimmiuni 47-nngorsimasut, Statens Serum Institutip marlunngornermi aamma ilisimatitsissutigaa. Ataasinngornermi 18-iusimapput.

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 7797
  Tunillanneqarsimasut 14
  Peqqisseqqittutut nalunaarutigineqartut 14
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Pissarsivik: nun.gl
  Nutarterneqarpoq
  septembarip 25-at 2020 nal. 10:45