Coronavirus: Inuit arfineq-pingasut akissutisinissamut utaqqisut
![](/sites/default/files/styles/image_934x467/public/article_images/89808236_1588166641338208_5458896870505971712_n.jpg?itok=J9NPpIOx)
Nutaanik kisitsisilerlugu nalunaaqutaq 15.10 nutarterneqarpoq.
Inuit pingasut tunillatsissimanersut paasiniarlugu Statens Serum Institutimit misissorneqartut akissutissarsipput. Taakkunannga coronavirusimik tunillatsissimasoqanngilaq.
Nutaarsiassatsialak tamanna nakorsaaneqarfiup tusagassiortunik katersortitsinermi saqqummiuppaa.
Qassiiusulli tigusiffigalugit maanna aamma misissorneqaleruttorput. Inuit pingasut allat coronavirusimik tunillatsissimanersut paasiniarlugu ippassaq sisamanngornermi tigusiffigineqarput. Ullumilu tallimat allat aamma tigusiffigineqarlutik.
Virusimik tunillaassuinaveersaarnissamut innersuussutit aaku:
- Asalluartarneq ajornanngippat asareernermi assaallu panerneranni assanut tunillannartuiaat atorlugu eqqiluisaarluarneq
- Inuit nuattut/toqqusaarluttut qanillinaveersaarneri
- Kakkissarfimmut ataasiartakkamut ikutsilluunniit peqiffianut quersorlutillu tangajortarit
- Kuniuinak, eqitaarinak assammiinallu.
Taakku pingasut tamarmik Nuummiittut, nakorsaanerup, Henrik L. Hansenip KNR-imut oqaatigaa.
AAMMA ATUARUK Ataatsimiititaliarsuaq: Inuit pingasut coronavirusimik tunillatsissimanngillat
Ullumi tallimanik misissugassanik tigusaqartoqarpoq. Nakorsaanerullu oqarnera naapertorlugu taakku ilaatigut sineriatsinnik ilaqarput. Nuup avataanit misissugassanik siullerpaamik tigusaqartoqartoq, nakorsaanerup KNR-imut ilisimatitsissutigaa.
Taassuma inuit qanoq amerlatigut ullumikkut misissorneqassanersut suli ilisimanngilaa. Misissugassatulli tigusat Københavnimut timmisartumik sapaatiuppat nassiunneqassapput, ataasinngorpallu ullaap-tungaani akissutisinissaq naatsorsuutigineqarpoq.
- Misissorneqartut misissorneqartussalluunniit tamarmik ersiutaasunik malugisaqarnertik pissutigalugu peqqinnissaqarfimmut saaffiginnissuteqarput, Henrik L. Hansen oqarpoq.
Coronavirusimut ersiutaasinnaasunik malugisaqartut amerlanerpaarpaat nunanut allanut angalasimanertik pissutigalugu misissorneqassapput.
Amerlasuut angerlarsimaannartinneqartut
Tamannalu pissutigalugu inuppassuit angerlarsimaffimminnit maannakkut aneqqusaajunnaaqqagallarput – taakkuli qanoq amerlatiginersut erseqqissumik ilisimaneqanngilaq:
Danmarkimi laboratoriamit inernerit ullumikkut pissarsiaqarnitsinnit Nakorsaaneqarfimmit aneqqusiunnaanngilagut. Inunnik tunillatsinnissamut aarlerinaateqangaatsiartuniissimasunik nammineq mattuteqasoqarpoq. Inuit taakku nalunaarsunngilagut, nakorsaaneq oqarpoq.
Tassa nunatsinni coronavirusimik tunillatsissimasumik suli nalunaarsuisoqarnikuunngilaq. Taamaammat peqqinnissaqarfiup nammakkersorpallaarnaveersaarnissaa pillugu tuniluuttoqalernissaanik pinaveersaartitsineq peqqinnissamut oqartussat manna ukkatarivaat.
Ersiutit suuppat?
Coronavirusimik tunillatsissimasut ukuninnga ersiuteqarsimapput:
- Panertumik quersorneq
- Kissarneqarneq
- Anersaartorniarnikkut ajornartorsiuteqarneq
Napparsimaveqarfinnimi amerlasuut ataatsikkut perululernissaannut inissaqartitsinngitsut, nakorsaanerup, Henrik L. Hansenip oqaatigaa.
Nuummi Dronning Ingriup Napparsimmavissuani sisamanik inissaqarpoq – anersaartuutinilli pilersuiffiusinnaasunik pilersitsinissaq pisariaqalissagaluarpat periarfissaavoq. Perululluinnalersulli innartinneqartariaqartut inissaqartinniarnissaat ajornartorsiutaanerpaassaaq.
AAMMA ATUARUK Aallarnissat taamaatikkusuppiuk? Angalatitseqatigiit aningaasanik utertitsisiinnaallutillu allanngortitsisinnaasut
- Tuniluunneq allartippat sulisussat naammannginnerat unammillernartuussaaq, Henrik L. Hansen oqarpoq.
Danmarkimi corona pillugu unammillertoqarpoq. Nakorsaanerulli Danmarkimit kalaallit napparsimasut inissaqartinneqannginnissaaq takorlooruminaatsippaa.
Tunillatsissimasunik nunatsinnukartoqarnissaa pinngitsoortissinnaanngilarput – takkuttoqassaaq. Uagulli tuniluunnerujussuaqannginnissaa qitiusumik suliassaraarput, nakorsaaneq oqarpoq.
Tunillatsissimasutut pasitsaanneqartut pingasut tunillatsissimanngitsut ullumi paasineqarpoq. Taakkunannga marluk Canadami ataatsimeersuarnermi 25.000-init peqataaffigineqartumi peqataasimapput. Ataatsimeersuarnermilu peqataasimasumik ataatsimik coronaviruseqalersimasumik paasisaqartoqarpoq.