Coronavirus: Atlantikup Avannaani Filmiliaasimasunik takutitsineq unitsinneqarpoq
Filmit assigiinngitsut nunatsinneersut, Savalimmiuneersut Islandimeersullu Atlantikup Avannaani Filmiliaasimasunik takutitsinermi isiginnaarneqarsinnaapput.
Tamannali ukioq manna unitsinneqarallarpoq.
Nualluut coronavirus peqqutaalluni Danmark matuneqarmat takutitsinerit marsip aqqarngani taamaatikkallarneqarput.
AAMMA ATUARUK Kalaallit Nunaat filmiliaasimasunik Københavnimi takutitsillualaavissaaq
Atlantikup Avannaani Filmiliaasimasunik marsip aqqarnganiit 15-iata tungaanut takutitsoqartussaagaluarpoq.
- Filmit sanalluakkat immikkuullarissullu nutaat nutaannginnerillu Savalimmiuneersut, Kalaallit Nunaanneersut Islandimeersullu takutinneqartussaapput, aaqqissueqataasoq Birgir Thor Møller oqarpoq.
Takutitsinerit aallarteqqissapput
Takutitsinerilli septemberip 23-ani aallarteqqissapput. Tassani filmit takutinneqanngitsut isiginnaarneqarsinnaapput ilitsersuisartunillu najuuttoqartillugu oqallittoqassalluni.
- Qujanartumik peqataasut tamarmik takkuteqqissapput. Taamaalilluta marsimi takutinngitsuukkagut isiginnaarneqarsinnaassapput immikkullu takutitsisoqassalluni, Birgir Thor Møller oqarpoq.
Atlantikup Avannaani Filmiliaasimasunik takutitsineq agguarneqartarpoq. ”Den tyske forbindelse” ukioq manna pingaarnertut sammineqarpoq.
Tassani Asta Nielsen erinniortoq pianistilu Tysklandimeersoq Eunice Martins ingiortigalugu filmimi nipeqanngitsumi quiasaarusiami ”Das Eskimobaby”-mi takuneqarsinnaassaaq.
Takutitsinerni aamma filmeeqqat pitsaanersiukkat nunatsinneersut Savalimmiuneersullu isiginnaarneqarsinnaapput. Ilitsersuisullu oqalliseqatiginissaannut periarfissaqassalluni.
Erinisunnerup kingorna aamma Paalup nuliarsarnera
Immikkoortoq DOX/Grønlandimi filmit piviusulersaarutit pingasut nunatsinnut tunngasut ilitsersuisunit nunanit allaneersunit suliarineqartut isiginnaarneqarsinnaapput.
Piviusulersaarut alla ”The Last Ice Hunters” Sloveniameersoq, marloriarluni takutinneqareersoq septemberimi isiginnaaqqinneqarsinnaavoq. Tassani nunatta kangiani piniartut kulturiat ullutsinnut naleqqussagaq ilaatigut sammineqarpoq.
Filmit allat isiginnaarneqarsinnaasut ukuupput: Kalaallit piviusuinnik tunngavilimmik isiginnaagassiaat ”Erinisunnerup kingorna”, Paalup nuliarsarnera aamma kinguaassiutitigut atornerlunneqarsimanerup kingorna inuuneq pillugu filmi piviusulersaarut ”Pilluarneq Ersigiunnaarpara”.
Atlantikup Avannaani Filmiliaasimasunik takutitsineq septemberip 28-iani naggataassaaq.
Uani paasisaqarnerusinnaavutit: https://www.nordatlantens.dk/filmdage
