Nunarsuarmi tamataqanngitsut ornittagaanni anginerpaaq coronavirusimik eqqugaasoq
Nunarsuarmi tamataqanngitsut ornittagaasa annersaanni Frankrigip kujasissortaaniittumi inuit 150-ingajaat coronavirusimik tunillatsissimapput.
Nunap immikkoortuani oqartussat nutaarsiassaqartitsivik CNN naapertorlugu taama nalunaarput.
Inuit tamataqanngitsut ornittagaanneereerlutik utertut 50-it tunillatsissimasut aamma paasineqarpoq.
Tamataqanngitsut ilaat coronavirusimik tunillatsissimasut peqqissutsimut oqartussat tamataqanngitsut ornittagaanni ulluni pingasuni misissuineranni paasineqarpoq.
Tunilatsissimasut amerlanerat najukkami oqartussat ernumanartutut taasimagaat, aviisi The Guardian allappoq.
"Tamataqanngitsut illoqarfiat"
Tamataqanngitsut ornittagaat Cap d'Agde Naturist Village tamataqanngitsut illoqarfiattut aamma taaneqartarpoq. Nunarsuarmi tamataqanngitsut ornittagaanni anginerpaavoq, tassaniittullu nalunnguffaseqassanerlutik mattaangassanerlutilluunniit namminneq aalajangersinnaavaat.
Neriniartarfinni, allakkerivinni, aningaaserivinni angallatiniluunniit mattaangasoqarsinnaavoq.
Tamataqanngitsut coronavirusip nunarsuaq tamakkerlugu tunillaassuunnerani nutaarsiassaqartitsivik CNN naapertorlugu aatsaat ernumatitsilinngillat.
Tamatarusunngitsorpaaluit qanermut assiaquteqaratik Pragip kangisissortaani illoqarfeeqqami seqinnisaartut inunnit arlalinnit naammagittaalliutigineqaramik, Tjekkiami politiit tamanna pillugu marsip naanerani aarlerisaaruteqarput.
Inuit tamataqaratik katersuussinnaasut qanermulli assiaquteqarnissaq qanillattunnginnissarlu piumasaqaataasut Tjekkiami politiit CNN naapertorlugu taamanikkut ilisimatitsissutigaat.
