Corona pillugu malittarisassat paatsuungassutigaagit? Aaku ataatsimut isigalugit
Nunatsinni tunillatsissimasutut nalunaarsorneqarsimasut aatsaat taama amerlatigipput: Covid-19-imik tunillatsissimasut katillugit 155-iupput, taakkunannga 144-t maanna Nuummiipput.
Nuummi tuniluuttoqarnera pissutigalugu killilersuutit Naalakkersuisunit tallimanngormat atulerseqqinneqarput. Killilersuinerit nutaat qaavatigut nuummiut septembarip ulluisa 16-iannili ilisimallualeriigaat atuupput: Tassami Nuummi innuttaasut neriniartarfinnut, imerniartarfinnut filmertarfinnut allanut iserniaruinik coronapasimik takutitsisinnaasariaqarput.
Coronapas pillugu malittarisassaq arlaleriarlugu sivitsorneqarpoq - taannalu maanna novembarip ulluisa 30-ata tungaanut atuulluni.
Malittarisassat nutaat Nuummi atuuttut aaku. Taakku novembarip ulluisa 26-at ilanngullugu atuutissapput.
Assi: Scanpix
- Nuummiut bussini, taxani, ininilu tamanit ornigarneqarsinnaasuni qanermut assiaquteqartariaqaqqilerput. Tassa imaappoq pisiniarfinni, atuakkanik atorniartarfinni, sutorniartarfinni, neriniartarfinni, imerniartarfinni, katersugaasivinni allani atorneqaqqusaalerput. Tamanna meeqqanut aqqaneq-marluk ataallugit ukioqartunut atuutinngilaq.
- Qanoq amerlatigisut katerissinnaaneranut aamma kililiisoqaqqippoq. Inuit amerlanerpaamik 20-t illut iluani katerissinnaatitaapput. Tamanna pisiniarfinnut atuutinngilaq.
- Inuit amerlanerpaamik 20-t silami aamma katerissinnaatitaapput.
- Tamanna ilinniarfeqarfinnut, atuarfinnut, ulluunerani paaqqinniffinnut politikkikkullu katersuunnernut atuutinngilaq.
- Angerlarsimaffinnili piumasaq malillugu katerissinnaavusi.
Assi: Christine Hyldal
Nuummiit nunatsinni sumiiffinnut allanut angallanneq aamma sukateriffigienqarpoq. Tamanna aamma Danmarkimukarniarlutik Kangerlussuarmut aqqusaaginnarnissannut atuuppoq. Malittarisassaq taanna sisamanngorpamit atuutilissaaq.
- Nuummiit nunatsinnut sumiiffinnut angalaniaruit tamakkiisumik akiuussuserneqarsimassaatit. Tamanna aamma Kangerlussuarmut aqqusaaginnarniaraluarit atuutissaaq.
- Nassatanik tunniussiartorninni akunnernik sivisunerpaamik 48-nik pisoqaassuseqartumik PCR-imik misissortinneq imaluunniit sukkasuumik misissortinnermik, tunillatsissimannginnernik uppernarsaataasumik takutitsisinnaassaatit.
- PCR-mik misissortinnermik, tunillatsissimannginnermik takutitsinissaq sisamanngorpamit atuutilissaaq. Matumani peqqinnissaqarfimmi piffissami matumani teknikkikkut ajornartorsiuteqarneq, coronamik tunillatsissimannginnermik piffissami eqqortumi uppernarsaateqarnissamik qulakkeerinnissinnaannginneq pissutaavoq.
- Taamaammat sisamanngorpat tungaanut Nuummiit nunatsinni sumiiffinnut allanut angalaniaruit coronapas "taamaallaat" takutittariaqarpat.
Inuit uku Nuummiit angalanissamut tamakkiisumik akiuussuserneqarsimanissamut piumasaqaatinut ilaatinneqanngillat:
- Inuit Nuummiit angerlarniarlutik aallartut.
- Inuit ilinniariarlutik aallartut.
- Inuit inuiaqatigiinni suliassaqartitaallutik angalasariaqartut.
- Inuit Covid-19-imut akiuussutissamik kapitinnissamut Nunatta Nakorsaaneqarfianit nalinginnaasumik innnersuunneqanngitsut.
- Inuit 11-nik ukiullit ukiukinnerusulluunniit.
- Sulisut tamanut angallassissummi pineqartumi aallartussanik atorneqartussanik sulisut.
- Inuit Nuummiit nunatta avataanut angalasussat nunatta iluani pisariaqanngitsumik uninngaffiunngitsumik aallartussat.
Inuit siusinnerusukkut Covid-19-imik tunillatsissimasut, tunillatsissimaneranniillu minnerpaamik ullunik 14-inik annerpaamillu sapaatit akunnerinik aqqaneq-marlunnik pisoqaassusilinnik uppernarsaasinnaasut, inatsisitigut tamakkiisumik akiuussuserneqareersimasutut isigineqassapput.