- Kapiteqqaalerama pissangaqaanga. immaqa sukanninnni annilaaraluarpunga. Neriuppunga iluaqutaassasoq tamatsinnut. Maannakkut ajunngitsorujussuuvunga, Sofie Hegelund oqarpoq.Assi: KNR / Malik Brøns

Coronamut nunatsinni akiuussuserneqaqqaartoq Sofie Hegelund: Annilaangalaarpunga

Coronamut nunatsinni akiuussuseeqqaarneq Nuummi Ippiarsummi ullumi ataasinngornermi nalunaaqutaq 9.20 pivoq. 79-inik ukiulik Sofie Hegelund akiuussuserneqaqqaartuunissaminut piareerpoq.

Sofie Hegelund sapaammut unnuaani sininneq ajulersimavoq.

Ataasinngornermimi talimigut kapitittussaavoq.

KNR-ip Sofie Hegelund ataasinngornermi ullaakkut kapitinngitsiartoq apersorpaa.

- Annilaangalaarpunga taamaattussaanngivillunga. Unnuaruna sinippiannginnama annernassasoralugu pissangagamalu.

79-inik ukiulik Sofie Hegelund taama oqarpoq. Ippiarsummi sulisut inuttaa coronamut nunatsinni akiuussuserneqaqqaartoorusunnersoq aperimmassuk akuersivoq, isumaqaramimi akiuussutissaq tamatsinnut iluaqutaassasoq.

- Neriuppunga ajorata anigorluassagipput, taanna oqarpoq.

Paaqqutarinnittarfimmi Ippiarsummi najugallit ilaat 30-t coronamut ullumikkut akiuussuserneqassapput. Tassani najugallit allat sisamat akiuussuserneqarusunngillat.

Ippiarsummilu sulisut 50-it coronamut aamma akiuussuserneqassapput.

Sofie Hegelund kaassuaammi issiavoq pissangallunilu. Inuttaata kapinissaanut piareersimasunut peqqissaasunukaanneqarpoq.

 

 

Peqqissaasut immikkut ilinniagallit akiuussusiissapput. Taakkua akiuussutissaliviit nakorsaasiorfissuit Pfizerip Biontechillu akiuussutissaliaannik imallit tigummiarpaat.

Imerpalasut taakkua kapisinikkut akiuussusiissutaassapput.

Peqqissutsimut naalakkersuisoq Anna Wangenheim (D), nunatta nakorsaanera Henrik L. Hansen nakorsarlu Paneeraq Noahsen inimi najuullutik malinnaapput. Ippiarsummi sulisut tusagassiortullu aamma najuupput.

 

 

Peqqissaasup Sofie Hegelund tikilluaqquaa aperalugulu sapigaqarnersoq kissarneqarnersorluunniit. Inuttaali sapigaqaranilu kissarneqannginnerarpoq.

Sofie Hegelundip aava peqqissaasup kajungartereermagu talia tunillannartuiarpaa. Kingornalu kapillugu coronamut akiuussuserpaa.

Sofie Hegelund pissanganermik sequnngerlunilu ujaluni sukaammerpai. Kapitinnini anneralugu nanana-rtorpoq.

 

 

Qaangiupporlu.

- Kapiteqqaalerama pissangaqaanga. immaqa sukanninnni annilaaraluarpunga. Neriuppunga iluaqutaassasoq tamatsinnut. Maannakkut ajunngitsorujussuuvunga, taanna oqarpoq.

 

 

Peqqissutsimut naalakkersuisup, Anna Wangenheimip, Sofie Hegelund kapitereermat assammippaa. 

Coronamut akiuussutissat ilaat timmisartumik Nuummit ullumi ataasinngornermi Ilussaliaanneqassapput. Ilulissani utoqqaat illuanni peqqissaavimmilu sulisut marlunngornermi akiuussuserneqassapput. Ilulissanilu innuttaasunik kulturip illuani tamatuma kingorna aamma akiuussusiisoqassaaq. Innuttaasut ataasiakkaarlugit aggersarneqassallutillu piffissamik tunineqassapput.

Corona pillugu allatseqarpoq taama nalunaarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat