Coronamik tunillatsissimasut marluk toqusut: Ataatsip covidimik tunillatsissimanini toqqutigigaa
Covid-19-imik tunillatsissimasut marluk napparsimmavimmi uninngasut ataasinngornermi toqupput.
Napparsimasup aappaata coronamik tunillatsissimasup nappaat alla toqqutigaa.
Napparsimasorli alla covid-19-imik tunillatsissimanermik toqquteqarpoq.
Nakorsaaneqarfik taama nalunaaruteqarpoq.
Uninngasut ippassaq aqqaneq-marluusut
Coronamik tunillatsissimasut napparsimmavimmi uninngasut ippassaq nalunaaqutaq marlunngortoq aqqaneq-marluupput. Qulit Nuummiipput, marlullu Aasianniillutik.
Uninngasut immikkoortunut pingasunut immikkoortinneqarput:
Immikkoortoq 1: Uninngasut COVID-19-imik pingaarnertut napparsimasut: Napparsimasut marluk.
Immikkoortoq 2: Uninngasut toqusullu, napparsimasut napparsimanerannut COVID-19 sunniuteqartoq, nappaalli ajoqusernerluunniit napparsimasup uninnganeranut pingaarusoq: Napparsimasoq ataaseq.
Immikkoortoq 3: Uninngasut, covid-19-imik tunillatsissimasut, taakkuli uninnganerannut toqunerannulluunniit tunillatsissimaneq pissutaanngitsoq. Taakku assersuutigalugu tassaasinnaapput ernisussat: Napparsimasut qulingiluat.
Nunatsinni coronamik tunillatsissimallutik toqusut katillugit sisamaapput.