Coronamik tunillatsissimasoq Narsamiittoq ajorunnaarsimasoq

Nunatsinni maanna coronamik tunillatsissimasumik uppernarsagaqanngilaq, pissutigalugu tunillatsissimasutut uppernarsarneqarsimasut 31-t tamarmik maanna peqqisseqqissimasutut nalunaaruteqarput.
Coronamik tunillatsissimasoq Narsami sapaatip akunnerata siuliani uppernarsarneqarpoq. Tunillatsissimasoq maanna peqqisseqqissimasutut nalunaarutigineqarpoq. Toqqorsivimmit assi. Assi © : KNR / Malik Brøns
Allattoq Jaaku Lyberth, Jens Thorin
marsip 09-at 2021 17:04

Narsami Covid-19-mik tunillatsissimasutut marsip ulluisa pingajuanni nalunaarutigineqartoq ajorunnaartutut nalunaartigineqartoq, Nunatsinni Nakorsaaneqarfiup paasissutissiissutigaa.

Taamaalilluni Kalaallit Nunaanni tunillatsissimasoqarunnaarpoq.

Corona kisitsinngorlugu naatsumik

* Misissortittut: 19.792
* Tunillatsissimanngitsutut uppernarsarneqartut: 19.652
* Tunillatsissimasutut uppernarsarneqartut: 31
* Peqqisseqqittutut nalunaarutigineqartut: 31

Paasissutissarsiffik: Nakorsaaneqarfik, marsip ulluisa qulingiluaat, 2021

Covid-19-imik tunnillatsissimasutut paasineqartoq, Danmarkimit Narsamut marlunngornermi februaarip ulluisa 23-anni tikinnerata kingorna misissorteqqinerani paasineqarpoq.

Tunillatsissimasoq Danmarkimut peqqissariartornermini Kalaallit Peqqissartut illuanniissimavoq, tassanilu sapaatini akunnerni kingullerni tunillatsissimasutut uppernarsarneqarsimasut qassiiupput.

Tunillatsissimasutut paasisaqartoqarnerata kinguneranik tunillatsissimasup angalanermini Narsamilu qanillisimasai tamarmik ujartorneqarput. 

AAMMA ATUARUK Nakorsaaneq Narsami tunillatsissimasoqarnera pillugu: Peqqissartut Illuanneeruit eqqumaffiginninniarit

- Angalanerup nalaani Narsamilu attaveqarfigisimasat misissuiffigineqaleruttorput. Nunatta nakorsaanerata Politiit suleqatigalugit tunillatsissimasup angalanermini attaveqarfigisimasai misissorneqarput, Namminersorlutik Oqartussat taamani allapput.

KNR-ip politiinut attaveqarniarnini marlungornermi iluatsinngilaa.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk