- Pissutsit qanoq inneri qanimut ataavartumillu malinnaaffigeqqissaarpagut, Peqqissutsimut naalakkersuisoq Mimi Karlsen tusagassiutinut nalunaarummi taama oqarpoq.Assi: Christine Hyldal/ KNR

Coronamik killilersuutit tamaasa atorunnaarsinneqarput

Coronap ajornartoortitsinerani nunatsinnut tikinnermi killilersuutit atuuttut ullumi pingasunngornermiit atorunnaarsinneqassapput.

Naalakkersuisut nittartakkaminni taama allapput.

Kalaallit Nunaannut tikinnermi misissortissimanissamik akiuussuserneqarsimanissamillu uppernarsaateqarnissaq taamaasilluni maajip ulluisa 18-iannit atuukkunnaasssaaq.

Tamanna tikittunut tamanut atuuppoq, tassami Kalaallit Nunaanni najugaqartunut, nunatsinnnut suliartortunut, takornarianut nunatsinnulluunniit tikittunut allanut tamanna aamma atuutissammat.

Coronavirusimulli atatillugu pissutsit allanngoratarsinnaanerat naalakkersuisut alaatsinaaffigaat, tamannalu tunuliaqutaralugu killilersuutit atuutilerseqqinneqarsinnaanerat sillimaffigeqqullugu:

- Killilersuutit atorunnaarsinneqarnerini peqqinnissakkut ilisimasallit naliliineri aallaavigineqarsimapput. Erseqqissaatigissavara naak nunatsinnut tikinnermi killilersuutit atuuttut atorunnaarsinneqarnissaat aalajangiunneqaraluartoq Covid-19-imut atatillugu pissutsit allanngoratarsinnaammata tamatumalu kingunerisaanik killilersuutit eqqunneqaqqissinnaammata. Pissutsit qanoq inneri qanimut ataavartumillu malinnaaffigeqqissaarpagut, Peqqissutsimut naalakkersuisoq Mimi Karlsen tusagassiutinut nalunaarummi taama oqarpoq.

Nunatsinni coronamik tunillatsissimasut januaarimi februaarimilu amerlanerpaammata, neriniartarfimmut, atuagaateqarfimmut, imerniartarfinnut timersortarfinnullu isernissamut coronamik tunillatsissimannginnermut uppernarsaateqarnissaq piumasaqaataavoq. 

Nunatsinni kommunit tallimaasut akornanni pingasuni imigassaarniartoqaqqusaajunnaarlunilu imerniartarfiit unnuaqeqqa sioqqullugu matusarput.

Coronamik tunillatsinnermi kingorna toqusut 21-usut

Tunillatsissimasunit 191-it napparsimmavimmi uninngasimapput, PCR-imik misissortinnikkut paasineqartut 12.055-iupput – tamatumalu saniatigut nalunaarsorneqanngitsunik tunillatsissimasorpassuaqarpoq.

PCR-imilli misissortissinnaaneq coronamik tunillatsinnikkut napparsimarululernissamut aarlerinaateqartunut kisimi atuuppoq. Allat nammineq misissuutit atortariaqarsimavaat peqqisseqqinnissamillu tungaanut angerlarsimaannartariaqarsimapput. 

Nakorsaaneqarfiup innuttaasut amerlanerpaartaat tunillatsereersimassangatippai. Coronap ilaata tuniluutianerusup, Omikronip allannguutaata BA.2-p qaammatini kingullerni pingasuni tuniluunnerpaaffigisaani amerlanerpaat tunillatsipput.

Kisitsisit ilisimaneqanngitsut

  • Marsip ulluisa 31-t tikillugu coronamik tunillatsissimasut 191-it napparsimmavimmi uninngasimapput. 
  • Taakku 14 procentiisa corona pingaarnertut pissutigaat.
  • Tunillatsissimasunit 101-t Nuummi napparsimmavimmi uninngapput, Sisimiuni 20-t, Ilulissani 13-it, Aasianni qulit, Qaqortumi qulingiluat, Maniitsumi qulingiluat, Nanortalimmi arfineq-pingasut, Upernavimmi arfinillit, Uummannami arfinillit, Paamiuni tallimat, Narsami pingasut Qasiannguanilu ataaseq.
  • Napparsimmavimmut unitsinneqartut 191-it agguaqatigiissillugit 52,7-inik ukioqarput.
  • Meeqqat 18-it inorlugit ukioqartut covid-19-imik tunillatsissimanertik pissutigalugu napparsimmavimmut unitsinneqartut katillugit 15-iupput.
  • Napparsimmavimmut unittunit 96-inik ukiulik utoqqaanerpaavoq.
  • Napparsimmavimmut unitsinneqartut 53 procentii arnaapput.
  • Covid-19-imik tunillatsinnermi kingorna toqusut katillugit 21-upput. Taakku 47,6 procentiisa covid-19 pingaarnertut toqqutigaat.
  • Toqusut ukiui agguaqatigiissillugit 80,3-nik ukioqarput.
  • Inuusunnerpaaq 68-inik ukioqarpoq.
  • Ukioqqortunerpaarlu 92-inik ukioqarluni.


Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl