Coronamik ajornartoorneq: Royal Greenland ataannarnissamut akiliisinnaassutsiminik qaffaasoq
Coronavirusip Kinami tuniluutilerneranit ajornartoorneq nunarsuup sinneranut marsip aallartinnerani sunniutipiloorpoq.
Nunarsuarmi nunat coronavirusip tuniluunnera pakkersimaarniarlugu unittuupiloormata Royal Greenland pingaarutilinnik aalajangiilertortariaqartarsimavoq.
Suliffeqarfissuup maannamut ukiuni qulingajanni pisortaanera, Mikael Thinghuss, taama oqarpoq. Taanna inuutilluni aatsaat taama nalorninartoqarfiutigisumik nalaataqarnerarpoq.
Ukiup qiteqqunneranut naatsorsuutit amigartooruteqarfioqisut
Royal Greenland 141 millionit koruuninik siorna ukiup qiteqqunnerani sinneqartooruteqarpoq.
39 millionit koruuninik ukioq manna ukiup qiteqqunnerani amigartooruteqarpoq.
Ukioq manna ukiup qiteqqunnerani siorna ukiup taamaalinerani kaaviiartitaminit 9 procentinik tassa 15 millionit koruuninik kaaviiaartitakinneruvoq.
- Akiliisinnaassutsitsinnik allanngutsaaliinissatta aningaasaqarnikkullu nalorninartoqarnerpaaffimmi inissisimal-luaannarnissatta qulakkeernissaat pingaartinnerpaavarput. Isumaqarpunga nunarsuarmi pissutsit marsimi qanoq ajortiginerat ilaannikkut puigortaripput, taanna oqarpoq.
Niuernerup unittoornissaa aarleqqutigisimagaat
Coronavirusip nunarsuarmi tuniluunnerata pakkersimaarneqalersinnaajumaarnersoq, taamanikkut ilisimaneqanngilaq.
Suliffeqarfissuup nioqqutissiaminik assartuisinnaajunnaarneranik niueruteqarsinnaajunnaarneranillu kinguneqartumik Mærskip Royal Arctic Linellu umiarsuaanni inuttat napparsimalernissaat suliffeqarfiulluunniit soorlu Kinami, USA-mi Canadamiluuniit niuerfiisa pingaarnerit matunissaat taamani siooragineqaqaaq.
- Inuutillunga aatsaat taama nalorninartoqarfiutigisumik nalaataqarpunga. Akiliisinnaassutsitsinnik allanngutsaaliinissarput taamanikkut nalunaarutigisariaqarsoraarput. Qanorluunniit pisoqaraluarpat akiliisinnaassuseqarnisssarput qulakkeertussaavarput, taanna oqarpoq.
AAMMA ATUARUK Royal Greenland millioninik annaasaqaraluartoq sinneqartooruteqarnissaq pisortap naatsorsuutigigaa
Taamaammat Royal Greenlandip pisortaqatigiivi aningaaseriviillu suliffeqarfissuup 750 millioninik akiliisinnaassuseqarnerulernissaanut isumaqatiginninniarput. Aningaasat taakku suliffeqarfissuup siorna kaaviiaartitai 5,3 milliardit kooruniusut eqqarsaatigalugit amerlapput.
Tassa imaappoq, 750 millionit koruuninik sippuisinnaanermut isumaqatiginninniarput.
Periarfissaq tamanna suliffeqarfissuarmut qanoq akeqassanersoq, Mikael Thinghuusip ilisimatitsissutigerusunngilaa, isumaqarporli pitsaasumik akeqartoq. Suliffeqarfissuup akiitsui ernialersukkat 276 millionit koruuninik, taamaalillutillu katillutik 2,3 milliardit koruuninngorlutik, 2020-mi ukiup qiteqqunnerani nalunaarusiaani erserpoq.
Nakkutilliineq najummassimaarnartoq
Pisortaqatigiit coronamik ajornartoorneq nunarsuup sinneranut qanoq sunniuteqartigisoq paasigamikku aqutsiniarnerat imaannaasimanngeqisoq, Mikael Thinghuus oqarpoq.
- Nalorninartoqarujussuarnera peqqutaarpiarluni sinilluartoqartarpallaarunanngilaq, taanna oqarpoq, aammali piffissaq taanna aalajangeriataallaqqissuseqarfiusimanerarlugu.
- Niuernermi missingersuusioqqissaarnermut taarsiullugu aalajangeriataallaqqissuseqarnissaq pingaaruteqartoq ilikkarparput. Oqalliseqatigiippallaarnata, tunisassiornermilli suliallit, tuniniaanermik suliallit il.il. suliaminnut pikkorinnerpaanerat akueralugu. Ataatsimeeqatigiittarnivut aamma akulikillivagut, taanna oqarpoq.
”Piareersimaasuteqaannaavissaagut”
Royal Greenlandimi paaseqatigiilluarnissaq nunarsuullu sinnerani pissutsinut atuuttunut naleqqussarnissaq attattuarumallugit pisortaqatigiit sapaatit akunneranut marloriarlutik tuniniaanermilu pisortat sapaatit akunneranut ataatsiarlutik marsimili ataatsimeeqatigiittalerput. Taamaaginnarallassasorlu ilimanartoq, Mikael Thinghuus oqarpoq.
AAMMA ATUARUK Coronap ilungersuatitsinerata Royal Greenland 39 milliuunit koruuninik amigartooruteqartikkaa
Nunarsuup coronavirusip nunarsuaq tamakkerlugu tunillaassuunneranit ukiuni tulliuttuni sunnerneqaqqagallaannarnissaa aallaavigalugu ingerlatsivoq.
- Coronavirusimik ajornartoorneq ukiualunni suli atuukkallassasoq ilimagaara. Taamaannerani aningaasaqarnikkut piareersimasuuteqaannaavinnissarput qularisariaqanngivipparput, taanna oqarpoq erseqqissaallunilu:
- Suliffeqarfissuarni ingerlalluarnerpaat allaat ajornartoorluinnarnermi aamma matusariaqarsinnaasarput, uagulli matusariaqarsinnaasut kingullersaat ilaanniinnissarput qulakkeerniassavarput. Tamanna qularutissaanngilluinnarpoq.
Coronamik ajornartoornerup kinguneri upernaaq ilimagineqartutut ajortiginngitsut paasinarsivoq, aamma Royal Greenland piareersimasuutiminit koruunimik ataasinnannguarmilluunniit atugaqarnani.
