Corona unammillernaraluartoq Kinami allaffittaap silataani Erfalasorput erfalavoq
Kalaallip diplomatip Jacob Isbosethsenip Kinami sinniisoqarfittaaq aallartinniarlugu Kinamut nuuttup aallartinniarnera ilungersunarpoq.
Sulilerlunimi Erfalasutta amunissaa pitinnagu, taanna sapaatip akunnerini pingasuni akunnittarfimmi ineeqqami mattusimaaqqaarpoq, ullut tamaasa aalajangersimasunik nerisaqarluni coronamullu misissortittuarluni.
- Assut ilungersunarpoq, maannakkulli anilluni nuanneqaaq, Jacob Isbosethsen oqarpoq.
Aalisakkat millionerpassuarnik nalillit
* Siorna Naalakkersuisut nalunaarutigaat kalaallit ingerlatsivii Asiap kangisinnerusortaanut koruuninik 2,3 milliardinik nalilinnik nioqquteqartartugut. Taakkunannga Kinamut nioqqutigisat annertunersaallutik ukiumut 1,5 milliardinik naleqarput.
* 2019-imi Royal Greenland aamma nalunaarpoq, namminneq Kina nioqquteqarfiginerpaasarlugu. Tamannalu pissutigerpiarlugu Kalaallit Nunaat tassanerpiaq aallartitaqarfittaartariaqartoq.
- Novembarip 18-ianni sinniisoqarfimmi sulilerama Erfalasorput amuarput kiisalu Savalimmiuniit Danmark-imiillu aallartitat ilassillutigit.
Kalaallit sinniisoqarfiat Beijingip qeqqani Danmarkip sinniisuutitaqarfianiippoq, Savalimmiullu sinniisoqarfiat aamma tassaniilluni.
Pisortatigut sinniisoqarfiup ammarnissaa corona pissutigalugu aappaagumut kinguartippoq. Ammaanissaq kinguartikkaluartoq ulloq Jacob Isbosethsenip aallartiffia persuarsiornarpoq.
- Pissutsit maluginiagassat amerlaqaat ulapaaqaagullu, taamaammat susoqarnera eqqaamavallaanngilara, amerlaqalutali tulluusimaarpugut, taanna oqarpoq.
Kalaallit sinniisuutitaqarfianni pisortap, Jacob Isbosethsenip, Danmarkip aallartitaa Thomas Østrup Møller savalimmiullu sinniisuutitaqarfianni pisortaq Sigmundur Isfeld qanimut suleqatigisussaavai.
Kinami sinniisunngortoq KNR-ip apersorniaraluaramiuk ulapaartoqarnera nalunaaquttalu nikinganera pissutigalugu periarfissaqarsimanngilagut. Taamaammat apeqqutit Jacob Isbosethsenip allalluni akisariaqarnikuuai.
Qarasaasiat oqarasuaatillu immikkuullarissut
Piffissami tulliuttumi Jacob Isbosethsen inissilluarniarsarissamaarpoq. Isumannaallisaaneq pissutigalugu oqarasuaatit qarasaasiallu immikkuullarissut pissarsiariniartussaavai.
Tamatuma saniatigut allaffik savalimmiut sinniisuutitaata aamma allaffigisaa iluarsaattussaatigaatsiassaaq ilaatigut natilersortussaalluni.
Sinniisutullu sulilinnginnerani aamma piareersagassat amerlaqaat.
- Unammilligassat amerlaqaat ingammik aaqqereertariallit, taamaammat aallaqqaataaniit suut tamaasa suliarerusukkaluarlugit nikallujuilluni suliassat ataasiakkaarlugit aaqqittariaqarpai.
- Nunami allamiilluni suliassat aallaqqaataaniit suliariniarneri piffissatornarput, uangalu attaveqaqatigisartagassakka diplomatitut pingaarutillit piareersartariaqarpakka, Jacob Isbosethsen oqarpoq.
Kalaallit, Savalimmiut, europamiut Danmarkillu erfalasui allaffiup, Kinami illoqarfiit pingaarnersaata Beijingip qeqqaniittup silataani erfalapput.
Kina immikkut sammineqarpoq – aammali Korea Kujalleq Japanilu
Kinami sinniisoqarfimmik aallartitsiniarneq sivisuumik pilersaarutaanikuuvoq. Siorna Inatsisartut ukiaanerani ataatsimiinneranni tamanna pisortatigut akuerineqarpoq tassalu maanna piviusunngorluni.
Kina Kalaallit Nunaanniit aalisakkanik nioqquteqarfiginerpaasat ilagimmassuk, aningaasatigut Kinamut attaveqarnerup patajaallisarnissaa suliassat pingaarnersaraat.
Tamatumalu suliariniarnerani Danmarkip aallartitaqarfianiiginnarani kalaallimik sinniisoqarneq tutsuiginarneruvoq, Jacob Isbosethsen naliliivoq.
- Kalaaleqatitsinnik sinniisoqarneq sulinitsinni tamatigut pingaarnerpaajutinneqassaaq, pissusissamisoortumik tutsuiginarluta inuiattut uagut allamiunik sinniisoqarata, nammineq misigisartagaqalissagatta namminerlu inerniliisinnaalissalluta, taanna oqarpoq.
