Corona pillugu ullumikkut kisitsisit: Tunillatsissimasut nutaat arfinillit

Ullup ataatsip ingerlanerani missortittunit 600-junit tunillatsissimasut arfinillit nutaat Nuummi naammattoorneqarput.

Taama nunatta nakorsaaneqarfia nalunaaruteqarpoq.

Paaqqinnittarfinni atuarfinnilu tunillatsissimasunik nutaanik suli nassaartoqartarpoq.

Nunatta nakorsaaneranit ilisimatitsissutigineqarpoq Nuummi Ukaliusami atuaqatigiit ataatsit akornanni tunillatsittoqarsimasoq, taamatullu aamma Ilinniartitsinermik Ilisimatusarfimmi ilinniaqatigiit ataatsit ilaanni tunillatsissimasumik naammattuuisoqarsimavoq.

Tunillatsittut suli amerliartorput

Nunatsinni akiuussuserneqarsimasut sapaatip akunnerani kingullermi 61.8 procentimiit 63.5 procentimut qaffariarsimapput.

- Innuttaasut aappassaaneertillutik akiuussertinniartut ikiliartorput, kisianni inuit 3.900 missaat siullermeerlutik akiuussuserneqarsimasut suli aappassaaneertillutik akiuussuserneqarsimanngillat, nunatsinni nakorsaaneqarfik ilisimatitsivoq.

Inuit allat 274-it akiuussusersortillutik sapaatip akunnera kingulleq aallartissimapput.

Taamaakkaluartorli Nuummi tunillatsittartut amerliartorput.

Sapaatip akunneranimi kingullermi (sap. ak. 37-mi, aaqq.) 96-it tunillatsissimapput, taakkunannga 92-it Nuummi.

- Nuummi innuttaasut 100.000-uppata sapaatip akunnerani kingullermi tunillatsissimasut 480-t missaanniissimassapput. 

Sapaatip akunneranilu 37-mi tunillatsissimasut katillugit 74-upput, taakkunannga 71-it Nuummiillutik. 

- Taamaalilluni tunillatsittartut suli amerliartorput.

Tunillatsissimasut ullumikkut amerlassusaat kommunikkaarlugit: 

• Avannaata Kommunia: 0
• Kommune Qeqertalik: 0
• Qeqqata Kommunia: Tallimat
• Kommuneqarfik Sermersooq: 125-t
• Kommune Kujalleq: 0