Corona pillugu ullumikkut kisitsisit: Tunillatsissimasut nutaat 524-t - aatsaat taama amerlatigisut
Nunatsinni tunillatsissimasut aatsaat taama amerlatigeqattaarput. Coronavirusimimmi tunillatsisisimasut nutaat 524-t paasineqarput, ullormullu paasineqarsimasuni aatsaat taama amerlatigalutik.
Nakorsaaneqarfiup oqarnera naapertorlugu akunnerit 24-t kingulliit ingerlanerani 1.983-it misissorneqarput.
Tunillatsissimasut nutaat illoqarfinni ukunaniipput:
Ilulissani 185-it
Aasianni 14-it
Sisimiuni 23-t
Maniitsumi marluk
Nuummi 253-it
Narsami 43-t
Qaqortumi sisamat
Nunatsinni tamarmi coronavirusimik tunillatsissimasunit qulingiluat napparsimmavimmi uninngapput, taakkunannga pingasut COVID-19 pissutigalugu uninngallutik arfinillillu coronavirusimik tunillatsissimasut allanik pissuteqarlutik napparsimmavimmi uninngallutik.
Misissuiviit tamanut misissuiviugunnaartut
Misissuisarnermut periuseq nutaaq
Misissueriaaseq allanngortinneqarpoq, taamaalilluni eqimattat maluinnaat misissuisarfimmut PCR-imik misissortikkiartorsinnaalerput:
Tassa utoqqaat inuillu uummatikkut puatigullu nappaateqartut tunillatsissimanermillu ersiuteqartut misissortikkiartorsinnaapput. Aamma inuit angerlarsimaffimminni sukkasuumik misissuutinit tunillatsissimasutut takussutisserneqartut.
Peqqisseqqittutut nalunaarutiginissaq, angerlarsimaffimmi misissornissaq kiisalu coronamik tunillatsissimaneq nuannertut nuallunnertullu kisimi misigisimanarpat napparsimmavimmut nakorsamulluunniit attaveqarani angerlarsimaffimmi mattusimaannarnissaq inuit namminneq akisussaaffiginerulerpaat.
Tamanna misissuisarfiit napparsimmaviillu malinnaasinnaajunnaarnerannik pissuteqarpoq.
Neriniartarfiit imerniartarfiillu sapaatini akunnerni marlunni tulliuttuni unnukkut quliniit ullaakkut tallimat tungaanut matoqqasassapput.
Naalakkersuisut ataasinngornermi tusagassiortunik katersortitsinerminni misissuinermi periutsimi allannguut saqqummiuppaat. Tunillatsissimasorpassuaqarnera pissutigalugu misissuisarfiit malinnaasinnaajunnaaqqapput. Taamaammat kikkut tamarmik PCR-imik misissorneqarsinnaajunnaarput.
Tassunga taarsiullugu inuit angerlarsimaffimminni namminneq sukkasuumik misissuutinik misissortalissapput.
AAMMA ATUARUK Misissuisarfiit napparsimmaviillu ilungersungaatsiarmata kikkunnut tamanut PCR-imik misissuisoqartarunnaartoq
Naalakkersuisut sukkasuumik misissuutinik 40.000-inik inniminniipput, taakku illoqarfinnut nunaqarfinnullu nassiunneqassapput.
Sukkasuumik misissuutit agguataarneqarnissaat kommunit namminneq aalajangissavaat. Misissuutit ilaat utoqqaat illuinut, meeqqat atuarfiinut meeqqerivinnullu agguaanneqassapput - ilaallu pisortat suliffeqarfiutaannut allanut agguaanneqassallutik. Pisortat suliffeqarfiutaanni sulisut nammineq misissuutinik aamma neqeroorfigineqassapput - kiisalu namminneq misissuutersinissaminnut akissaqanngitsunut kommunip allaffeqarfiini pissarsiarineqarsinnaatinneqassallutik.
Naak misissuinermi periuseq allanngortinneqaraluartoq nakorsaaneqarfimmit corona pillugu kisitsisinik ullormut suli saqqummiisoqartassaaq. Inuilli imminnut peqqisseqqittutut nalunaarutisalernerat pissutigalugu nakorsaaneqarfiup tunillatseqqasut qanoq amerlatiginerat kisitsisertalersinnaanngilaa. Taamaammat tunillatseqqasut amerlassusaat ullormut nutarterneqartartuni ilaajunnaarsinneqassaaq.