Corona pillugu ullumikkut kisitsisit: Nuummi tunillatsittoq nutaaq ataaseq

Tunillatsissiamsoq ataasiinnaq paasineqartoq corona pillugu ullumikkut kisitsisit takutippaat.

Nakorsaaneqarfik taama paasissutissiivoq.

Tunillatsissimasoq nutaaq Nuummiippoq.

Misissuisarfimmi ippassaq misissuisoqanngilaq - taamaallaat pinasuartumik ikittuinnarnik misissuisoqarsimasoq Nakorsaaneqarfik paasissutissiivoq.

Nunatsinni tunillatsissimasut ullumikkut katillugit 102-jupput. NUnatsinni tunillatsissimasut amerlanerpaagamik 103-jupput. Tamanna aggustip qiteqqunnerani pivoq.

Tunillatsissimasut amerlassusaat kommunikkaarlugit:

• Avannaata Kommunia: 1
• Kommune Qeqertalik: 0
• Qeqqata Kommunia: 4
• Kommuneqarfik Sermersooq: 97
• Kommune Kujalleq: 0

Tunillatsissimasut sapaatip akunnerata naanerani paasineqartut 14-iupput.

Nuummi tuniluuttoqarpoq, tassa imaappoq tunillatsissimasut ilaat sumi tunillatsissimanerat ilisimaneqanngilaq.

Corona pillug malittarisassat Nuummut sisamanngormat sukaterneqangaatsiarput. Malittarisassat Sisimiuni atuuttut qasukkarneqarput, malittarisassallu illoqarfinnut annerpaanut marlunnut atuuttut maanna assigiilerput.

Taamaammat neriniartarfinnut, imerniartarfinnut timigissartarfinnullu isissaguit tamakkiisumik akiuussuserneqarsimassaatit. Tamakkiisumillu akiuussuserneqarsimanngikkuit tunillatsissimannginnermut uppernarsaammik sivisunerpaamik akunnernik 48-nik pisoqaassusilimmik takutitsisinnaassallutit.

Sumiiffiit uku tamakkiisumik akiuussuserneqarsimallutit imaluunniit coronamik tunillatsissimannginnermut uppernarsaammik sivisunerpaamik akunnernik 48-nik pisoqaassuseqartumik peqaruit aatsaat iserfigisinnaavatit:

• Neriniartarfiit, kaffisorniartarfiit, imerniartarfiit, diskotekit assigisaallu, kiisalu silami nunaminertat taakkununnga atasut.
• Kulturikkut sullissiviit: kulturikkut illorsuit, filmertarfiit, katersugaasiviit, inersuit saqqummersitsiviit assigisaallu.
• Innuttaasut illui assigisaallu.
• Atuakkanik atorniartarfiit.
• Illup iluani silamilu timersortarfiit, soorlu init timersortarfiit, inersuit timersortarfiit, naluttarfiit, timigissartarfiit aamma isikkamik arsartarfiit.
• Nujalerisut, tagiartuisartut, pinnersaasarfiit assigisaallu.

Akiuussutissamik kapitisimanngikkuit tunillatsissimannginnermullu uppernarsaateqarnak ukununnga suli isersinnaavutit:

• Pisiniarfiit
• Allakkeriviit
• Mittarfiit
• Pisortani oqartussaasut sulliviillu pilersuiviit kiffartuussinermi saaffiginnittarfii.
• Assartuutit tamanit atorneqarsinnaasut utaqqisarfii.
• Init suliannik ingerlatsivigisassatit.