Corona pillugu ullumikkut kisitsisit: 497-it tunillanneqarsimasutut ullup unnuallu kingulliup ingerlanerani paasineqartut
Nunatsinni inuit 497-it coronavirusimik tunillanneqarsimasutut ullup unnuallu kingulliup ingerlanerani paasineqarput.
Arfininngornermi januaarip ulluisa arfineq-pingajuanni tunillanneqarsimasutut kisitsisit ullumi saqqummiunneqarput.
Inuit misissortittut affaasa missaat Nuup avataani misissortissimasuupput. Misissuinerit taakku pillugit kisitsisit ullualunnguanik pisoqaassuseqarsinnaallutik.
Nuummi inuit 197-it ullup unnuallu kingulliup ingerlanerani tunillatsissimasutut paasineqarput.
AAMMA ATUARUK Corona pillugu ullumikkut kisitsisit: Aatsaat taama amerlatigisut tunillanneqarsimasut
Ilulissani misissortittut 427-t akornanni 187-it tunillatsissimasutut paasineqarput, misissortittut 44 procentiisa missaat tunillanneqarsimasutut paasineqarlutik. Coronavirus Ilulissani tuniluutilertortorujussuusoq kisitsisit takutippaat.
Maniitsumi misissortittut 105-it akornanni 37-t tunillanneqarsimasutut paasineqarput, tassa misissortittut 35 procentiisa missaat tunillanneqarsimasutut paasineqarlutik.
Illoqarfiit qulaani taakkartorneqartut saniatigut sumiiffinni ukunani aamma tunillatsissimasoqarpoq:
Qaqortumi arfineq-pingasut, Narsami 30-t, Nanortalimmi arfinillit, Sisimiuni sisamat, Aasianni aqqaneq-marluk Ittoqqortoormiinilu 22-t.
Ittoqqortoormiit pillugit kisitsisit jaunaarip ulluisa aappaanneersuupput.
Napparsimmavinni nuna tamakkerlugu sapaammi ullup-qeqqaanerani uninngasut katillutik arfiniliupput.
Inuk ataaseq Upernaviup napparsimmaviani uninngavoq, sinnerilu tallimat Nuummi unitsinneqarsimallutik. Taakkunannga ataaseq peruluttut inaanni uninngalluni.
