Corazón Aquino toquvoq
Filippinerini innuttaasut aliasupput, nunami tassani siornatigut præsidentiusimasoq Corazón Aquino sivisuumik napparsimareerluni 76-inik ukioqarluni arfininngormat toqugami.
Allattoq Mads Lynge
Kisermaassilluni naalakkersuisuusimasumik Ferdinand Marcosimik 1986-imi uppisitseqataasimasutut Corazón Aquino eqqaamaneqarpoq.
Filippinerini innuttaasut taamanikkut mumisitseqataapput.
Filippinerini illoqarfiit pingaarnersaanni Manilami innuttaasut naneruutinik ikititeripput naalagiarrallutillu, USA-llu nunanut allanut ministeriata Hillary Clintonip Aquino sapiitsuliortuunerarlugulu ataqqinartuunerarpaa.
Corazón Aquino politikkimut iserpoq uia Benigno Aquino Manilap mittarfiani 1983-imi toqutaareersorlu.
Benigno Aquino ukiuni pingasuni USA-meereerluni Filippinerinut tikimmat Manilami toqutaavoq.