COP15-ip iluatsinngitsoorneranut Danmark pisuutinneqarpoq

Naalagaaffiit Peqatigiinni pisortaq pissaaneqaqisoq, aamma COP 15-imik aaqqissuisuusoq, Yvo de Boer, ataatsimeersuarneq naammasseqqammiinnartoq qarasaasiakkut decembarimi taama allappoq.

- Allagartaq uppernarsaat COP 15-ip aallartinnissaanut sapaatip akunnera ataaseq sioqqullugu danskit saqqummiummassuk ukiut marluk piareersaatigisimasavut qatangiinnarpullusooq... Ataatsimeersuarnissaq taaneqaraluartoq malunnaateqanngivippoq, uppernarsaallu oqimaaqatigiinngilaq, de Boer suleqatiminut nassuiaavoq, Berlingske Tidendeni allaaserineqarpoq.

Silap pissusaata allanngoriartornera pillugu atuakkiaq ullumi saqqummertussaavoq, "Kampen om klimaet. Historien om et topmøde, der løb løbsk". "Silap pissusaata allanngoriartornera pillugu akiuunneq. "Ataatsimeersuarneq unitsikkuminaatsoq pillugu oqaluttuaq" - taama kalaallisuunngortissinnaagunarparput.

Atuakkami aamma ersersinneqarpoq Danmarkimi naalakkersuisut iluminni avissaartuutilersimasut, taamanikkummi COP 15 ministeri Connie Hedegaard atuakkami issuarneqarpoq, oqarsimammat uppernarsaat saqqummiunneqarmat nammineq ilisimasimanngikkini, paasigamiullu saqqummiunneqarsimasoq assut kamaatigisimagini.