COP15-imi suliniarneq pillugu folketingimi oqaatsit sakkortuut

"Kukkuneq kamanaatsoq" "aattoortitsineq" Danmarkip COP15-imi siulittaasuunerata "nunani tamalaani tusaamaneqarnera tutsuiginanngitsoq".

Danmarkimi naalakkersuinikkut illuatungiliuttunit SF-init Socialdemokratinillu oqaatsit sakkortupput, Københavnimi decembarimi silap pissusaa pillugu ataatsimiinnerup ingerlasimanera ippassaq Folketingip ataatsimiittarfiani oqallisigineqarmat. Partiit marluullutik ministeriuneq Lars Løkke Rasmussen pigunarpaat.

Akerlianilli VKO-mi amerlanerussuteqartut ministeriunermik kiisalu COP15-ip ingerlanneqarneranik nersualaarinnipput. "Suut tamarmik nakkutigineqarput", danskillu naalakkersuisui "ajungivissumik naammassisaqarlutik", Dansk Folkeparti, Konservativit aamma Venstre ilaatigut taama oqaaseqarput.

Lars Løkke Rasmussenip pisut ilaasa allatut suliarineqarsinnaagaluarnerat nassuerutigaa, naammassineqartulli "ilimanaateqarsinnaasut eqqumiitsuliaattut" taallugit.

- Taamaattoq ima inerniliivunga, tamanna qanorluunniit eqqarsaatigigaluarukku - eqqarsaatigingaatsiarsimagakkumi - taava inernerineqartuninngarnit pitsaanerusunik suliaqarsimanavianngikkaluarpugut, taama oqarnera aviisimi ullormut saqqummersartumi Informationimi issuarneqarpoq.

Partiit oqallinneq tunngavigalugu ullumi akuersissutissatut siunnersuummut taasissapput.

Illuatungiliuttut allatut siunnersuummik saqqummiussipput. Tassani ilaatigut oqaatigineqarpoq Danmarkip COP16-imi Mexicomi anguniagassaa inatsisitigut pinngitsoorani atuuttussaassasoq aammalu ilaatigut nunat EU-mut ilaasortaasut ukioq 2020 tikillugu annikilliliinertik 20-miit 30 procentinik annertusissagaat.

Taakkua marluk tamarmik naalakkersuisut siunnersuutaanni ilaanngillat.