Connie Hedegaard: USA sunnerniartariaqarparput
Silaannaap allanngorarneri ilisimatuunit eqqartorneqartuartut, Amerikami naalakkersuinermik suliaqartut namminneq qanimut takorusulerpaat. Amerikami senatori John McCain, danskit avatangiisinut ministeriat, Connie Hedegaard, nunanullu allanut ministeri, Per Stig Møller, angalaqatigalugit sapaatip akunnerani tullermi nunatsinnukassaaq.
John McCain USA-mi tusaamaneqaannarani kingullermik præsidentissarsiortoqarmat maanna præsidentiusoq unammillerlugu qinigassanngortippoq. 08´-imilu præsidentimut qinersisoqalerpat qinigassanngorteqqinniarluni isertuarani oqartarpoq.
- Silaannaap allanngoriartorneri kimilimmik nunarsuaq tamakkerlugu suliniuteqarfiginiarutsigik USA-mi republikanerit sunnerniartariaqarpavut, taamaattumik sapaatip akunnerani tullermi Qeqertarsuup Tunuanukaqatiginiarpavut, Connie Hedegaard oqarpoq.
Nunani 25-ini avatangiisinut ministerit siorna taassuma Qeqertarsuup Tunuani angalaqatigisimagamigit qanimut paasititsiniaaneq qanoq kimeqartiginersoq misilittagaqarfigaa:
- Kalaallit Nunaanni angallassatta avatangiisit paasititsiniaassutigisavut qanimut takoreeraangamikkik paasisaqarnerusutut ilillutik eqqartugaat allanngorluinnarsinnaasarput, Connie Hedegaard oqarpoq.
Avatangiisillu imaannaanngitsut takutinneqartarput; ukiukkut sikusartut arlallit sikussaarsimapput, sermeq iigartartoq kilometererpaalunnik qinngorparsimavoq imaluunniit sukkanerujussuarmik iigartalersimalluni. Taakku saniatigut amerikami ilisimatuut sapaatip akunnerani kingullermi nalunaarput siorna sermeq iigartartoq siornaak iigartumut naleqqiulluni pingasoriaammik sukkanerusimasoq.
USA-p suleqataalernissaa nunarsuarmioqatigiit tamarmik utaqqiinnaraat Connie Hedegaardip erseqqissarpaa.
- Massakkut USA-mi præsidentiusoq suliniuteqarusunngitsoq tamatta ilisimalereerparput. Paarlattuanilli John McCain suleqataarusuttuummat neriulluarpugut, Connie Hedegaard naggasiivoq.
